Կարկուտն ավերել է խնձորի, խաղողի, պոպոքի բերքը. Աղձք և Օրգով գյուղերի բնակիչներ
Արագածոտնի մարզի մի շարք գյուղերում տեղացած ուժգին կարկուտը վնասել է ամբողջ բերքը:
Խոշոր կարկուտից տուժել են հատկապես Աղձք և Օրգով գյուղերի բնակիչները:
«Պոպոքի, խնձորի ամբողջ բերքը լցվել է ծառերի տակ: Ահավոր վիճակ էր, ամբողջ փողոցները սպիտակ կարկուտի շերտով են փակվել»,- NEWS.am-ի հետ զրույցում ասաց Օրգով գյուղի բնակիչներից մեկը:
Աղձքի վարչական ղեկավար Արթուր Ավետիսյանն էլ նշեց, որ վնասվել են խնձորի, խաղողի և մյուս պտղատու ծառերի բերքը։
«Հակակարկտային կայաններն աշխատել են, բայց տեղացած կարկուտը շատ ուժգին էր, մեծ վնասներ է պատճառել»,–ասաց նա։
Հետևեք մեզ Viber-ում
