Չինաստանը և Ռուսաստանը միջուկային տերություններին կոչ են արել հրաժարվել սառը պատերազմի մտածելակերպից

Չինաստանը և Ռուսաստանը միջուկային տերություններին կոչ են արել հրաժարվել Սառը պատերազմի մտածելակերպից և զրոյական գումարի խաղերից։ Այս մասին ասվում է կողմերի համատեղ հայտարարության մեջ, հաղորդում է «Սինհուա»-ն։

Կողմերը շեշտել են խոշոր երկրների միջև կառուցողական հարաբերությունների պահպանման կարևորությունը՝ գլոբալ ռազմավարական խնդիրների լուծման գործում։

Միջուկային ակումբի անդամները հատուկ պատասխանատվություն են կրում միջազգային անվտանգության և գլոբալ ռազմավարական կայունության համար, նրանք պետք է զերծ մնան ռազմավարական ռիսկեր առաջացնող քայլերից և խնդիրները լուծեն փոխադարձ հարգանքի վրա հիմնված հավասար երկխոսության և խորհրդակցությունների միջոցով՝ վստահությունը ամրապնդելու և վտանգավոր սխալ դատողություններից խուսափելու համար, նշել են Պեկինը և Մոսկվան։