Արցախում Ադրբեջանի կողմից գյուղերի ոչնչացումը շարունակվելու է, նրա ձեռքը բռնող չկա, քար անտարբերություն է՝ թե՛ ՀՀ իշխանությունների, թե՛ միջազգային կառույցների կողմից. Լեռնիկ Հովհաննիսյան

2020 թվականի Արցախի 44-օրյա պատերազմի ժամանակ Ադրբեջանի կողմից օկուպացրած Սարգսաշեն գյուղն ամբողջովին ոչնչացվել է։ Տեղեկությունը հրապարակվել է «Ombudsman of Culture of the Armenian Highlands» ֆեյսբուքյան էջում։

 «Արբանյակային լուսանկարների վերլուծությունը փաստում է` գյուղը, որը բռնազավթվել էր թուրք-ադրբեջանա-ահաբեկչական դաշինքի կողմից 2020 թ․ սանձազերծած պատերազմի ընթացքում, 2021 և 2024 թվականների տվյալներով՝ կրում էր լայնածավալ ավերածություններ, իսկ 2025 թ. արբանյակային պատկերները վկայում են ամբողջական և համակարգված ավերման մասին։ Սարգսաշենն իր տներով, փողոցներով, պատմական շերտերով գրեթե հիմնովին ոչնչացվել է»,- ասված է հաղորդագրությունում։

Սարգսաշենն Ադրբեջանի կողմից օկուպացված Արցախի Հանրապետության հերթական գյուղերից մեկն է, որն Ադրբեջանի կողմից հիմնովին ոչնչացվում է։

 Արցախի Հանրապետության կրթության, գիտության, մշակույթի և սպորտի նախարարի տեղակալ Լեռնիկ Հովհաննիսյանի խոսքով՝ Սարգսաշենը Մարտունու շրջանի պատմական բնակավայրերից մեկն է, որի շրջակայքում կային բազմաթիվ հուշարձաններ, հին պատմական գերեզմաններ, գյուղամիջյան եկեղեցի:

«Սարգսաշենը նաև այն գյուղերից մեկն է, որտեղից ուխտագնացության սովորույթը միշտ եղել է։

Սա Ադրբեջանի պետական քաղաքականությունն է, նրա ձեռագիրը, որը մենք տեսել ենք 2020 թվականի պատերազմի ընթացքում, պատերազմից հետո, հատկապես՝ Արցախի հայաթափումից ու արցախահայերի բռնի տեղահանությունից հետո։ Արցախում հայկականությունը վերացնելն Ադրբեջանի մշակութային ցեղասպան քաղաքականության մի մասն է, որի դեպքում, բացի պատմական հուշարձանները ոչնչացնելուց, ոչնչացնում է նաև պատմական լանդշաֆտը՝ ի դեմս մեր պատմական բնակավայրերի։ Սարգսաշենը հենց այդ պատմական բնակավայրերից մեկն է, ոըը գտնվում է պատմական Վարանդա գավառում, այնուհետև նոր վարչական բաժանմամբ՝ Մարտունու շրջանում»,– 168.am-ի հետ զրույցում նշեց Լեռնիկ Հովհաննիսյանը։

Նա նաև ասաց, որ Սարգսաշենում կային ոչ միայն պատմական, այլև բնության բազմաթիվ հուշարձաններ, բացի այդ, ուներ բազմաթիվ զբոսաշրջային վայրեր, որոնք այցելուների համար հետաքրքիր էին։

«Ցավոք, այդ ամենն այսօր արդեն կորսված է։ Արցախում Ադրբեջանի կողմից գյուղերի հիմնովին ոչնչացումը կրելու է շարունակական բնույթ, քանի որ նրա ձեռքը բռնող չկա, քար անտարաբերություն է՝ թե՛ ՀՀ արտգործնախարարության, իշխանությունների, թե՛ միջազգային կառույցների կողմից»,- շեշտեց նա։

Նա նաև տեղեկացրեց, որ Ադրբեջանի կողմից, բացի Սարգսաշենից, հիմնովին ոչնչացվել է Քարին Տակը, Հադրութի շրջանից Թաղուտ գյուղը, Լիսագոր բնակավայրը, եթե մյուս բնակավայրերում գոնե տների որոշ տեղեր տեսանելի են, Լիսագորում այդ ամենը չկա, փոխարենը՝ կառուցել են ինչ-որ կառույցներ։ Նաև ոչնչացվել է Մոխրենես բնակավայրը, Մարիամաձորը, Սղնախի մի մասը չկա՝ գերեզմանոցի հետ միասին։

 Նա ընդգծեց, որ Արցախի հուշարձանների փաստագրման գործընթացը շարունակվում է, այս պահին արդեն ունեն 5658 հուշարձան։