ՀՀ իշխանությունն օգտագործում է Բաքվից հնչող սպառնալիքները սեփական ժողովրդին վախեցնելու համար. Տիգրան Աբրահամյան

Սա առաջին դեպքը չէ, երբ ադրբեջանական հաղորդագրությանն ի պատասխան ԵՄ դիտորդական առաքելության ներկայացուցիչները արձագանքում են, սա արտասովոր բան չէ, այլ բան է, թե հնարավոր զարգացումների պարագայում այս քաղաքացիական դիտորդական առաքելությունը ինչպիսի ներգործություն կարող է ունենալ: Այս մասին NEWS.am-ի հետ զրույցում նշեց ԱԺ «Պատիվ ունեմ» խմբակցության քարտուղար Տիգրան Աբրահամյանը:

«Մենք նրանց տեղակայումից ի վեր ունեցել ենք մի ողբերգալի դեպք, որը տեղի է ունեցել երկու տարի առաջ Ներքին Հանդի ուղղությամբ, երբ որ միջադեպը ավարտվել է հայկական կողմի չորս զոհերով և արձագանքը միայն հետագայում է եղել, այն էլ բնականաբար որևէ ազդեցություն չի ունեցել արդեն դեպքերի հետագա զարգացումների վրա: Այնպես որ ես այս դեպքում չեմ ուզում ոչ գերագնահատել, ոչ թե գերագնահատել այն արձագանքը, որը այս իրավիճակում հնչել է»,-ասաց նա:

Հարցին՝ Ադրբեջանը ի՞նչ նպատակ է հետապնդում ապատեղեկատվական այս արշավով, Աբրահամյանը պատասխանեց. «Հայաստան-Ադրբեջան բանակցային գործընթացը ունի տարբեր հարթություններ, մեկը փաթեթային առումով ներառում էր այն 17 կետերը, որի ավարտի մասին օրեր առաջ հայտարարեցին Բաքվից և Երևանից, բայց մյուս կողմից դրա այլ շերտեր կան, որոնք ենթադրում են Ադրբեջանի կողմից բարձրաձայնվող, օրինակ, «Զանգեզուրի միջանցք» եզրույթը և դրա տակ գործընթացը, որը իրականում վերաբերում է ռեգիոնալ ապաշրջափակմանը, բայց չգիտես ինչու Ադրբեջանը նպատակային ձևով անընդհատ փորձում է դա ներկայացնել «Զանգեզուրի միջանցքի» ներքո։

Երկրորդը վերաբերում է Հայաստանին ուղղված այն պահանջին, որը ենթադրում է ՀՀ սահմանադրության փոփոխություն և առաջին հերթին ենթադրաբար անկախության հռչակագրի հղումերից ձերբազատում։ Կարևոր ուղղություններից մեկը վերաբերում է ապառազմականացմանը, բայց ցավոք խնդիրը ոչ թե գնում է կողմերին, այլ ադրբեջանական պահանջ է կոնկրետ ուղղված է Հայաստանին: Այս ընթացքում Ադրբեջանը անընդհատ սպառազինվում է մեծածավալ, բավականին մեծ մասշտաբների, Հայաստանի հետ շատ քիչ համեմատելի, բայց չգիտես ինչու այդ հարցը երբևէ չի դառնում առաջնային քննարկման առարկա: Սակայն Ադրբեջանը ամեն կերպ Հայաստանի ցանկացած ռազմական ձեռքբերում բանակցությունների առարկա է դարձնում»,- ասաց ընդդիմադիր պատգամավորը:

Նա նաեւ նկատեց, որ վերջին շրջանում Հայաստանին առաջադրված պահանջներից է այն մարդկանց արտահանձնումը, որոնք ըստ ադրբեջանյան դատարանների ռազմական հանցագործներ են, մասնավորապես խոսքը վերաբերում է Հայաստանի երկրորդ, երրորդ նախագահներին, տարբեր բարձրաստիճան զինվորականների և այլն։

«Եթե իրավիճակին նայում ենք այս վերջին տեղեկատվական արշավի համատեքստում, ես ուզում եմ նաև տեղեկացնել, որ զուգահեռ վերջին մեկ շաբաթվա ընթացքում Ադրբեջանը տեղեկատվական նաև այլ արշավ է մեկնարկել, անմիջապես կենտրոնական իշխանություններից կառավարվող մի քանի մեդիա հարթակներում ադրբեջանցիները «վերլուծականներ» են թողարկում այն մասին, որ Հայաստանը պատրաստվում է հարձակման, իբր Հայաստանը սպառազինություն է բավականին կուտակել, որը օգտագործելու է որևէ ուղղությամբ Ադրբեջանի նկատմամբ սադրանքների համար:

Այսինքն Ադրբեջանը մի կողմից այդ 17 կետերի շուրջ Հայաստանի հետ գործընթաց է համաձայնեցրել, մյուս կողմից ուժեղացրել է ճնշումները բոլոր այն նախապայմանների մասով, որոնք ընդհանուր փաթեթում չեն տեղավորվել:

Հիմա թե իրադարձությունները ինչպես կզարգանան, դա կմնա որպես Հայաստանի դեմ օգտագործվող ճնշում կամ շանտաժ, թե հետագայում կդառնա որևէ ուղղությամբ հնարավոր բախում կամ հարձակում, դա որոշակի այլ գործոններով է պայմանավորված, որի մասին այս պահին դժվար է խոսել»,- ընդգծեց Տիգրան Աբրահամյանը՝ հավելելով, որ սա շանտաժի էլեմենտներ է շատ ավելի մեծ պարունակում:

«ՀՀ իշխանությունը շատ դեպքերում օգտագործում է Ադրբեջանից հնչող սպառնալիքները նաև սեփական ժողովրդին վախեցնելու առումով: Մենք այդպիսի օրինակ ունեցանք Կիրանցում մեկ տարի առաջ տեղի ունեցած իրադարձությունների ժամանակ, երբ իշխող ուժի ղեկավարը բառիս բուն իմաստով ասում էր, որ եթե մեկ շաբաթվա ընթացքում այս չորս գյուղերը չհանձնենք, Ադրբեջանը ամենայն հավանականությամբ պատերազմը կսկսի։

Հիմա միանշանակ դժվար է ասել, Ադրբեջանը որ ուղղությամբ գնա՝ սա կօգտագործի իշխանության դեմ հայաստանյան ճնշումը մեծացնելու և իր մյուս պահանջները բավարարելու համար, թե՞ ինչ-որ փուլում նաև անհրաժեշտություն կհամարի որևէ ուղղությամբ տեղային մարտեր ծավալել»,-ասաց պատգամավորը: