Ժողովրդի թիկունքում՝ ժողովրդի դեմ

Տավուշի սահմանամերձ բնակավայրերում ակտիվ ընթանում են ականազերծման աշխատանքներ՝ հայկական տարածքները նախապատրաստելով թշնամուն հանձնելուն, սակայն ՀՀ փոխվարչապետ Մհեր Գրիգորյանի գրասենյակը հայ հասարակությունից գաղտնի է պահում, թե որ թվականի քարտեզն են հիմք ընդունել։

«Փաստինֆոն» փետրվարի 4-ին հարցում էր ուղարկել Գրիգորյանի գրասենյակ` խնդրելով պարզաբանել, թե հայ- ադրբեջանական սահմանազատման և սահմանագծման հանձնաժողովի վերջին հանդիպումից հետո ինչով են պայմանավորված սահմանազատման աշխատանքների ձգձգումները, երբ են պատրաստվում սկսել աշխատանքները և ինչ քարտեզներ են հիմք հանդիսանալու սահմանազատման աշխատանքների համար այս փուլում։

Ի պատասխան մեր հարցման՝ 10 օր անց մեզ հայտնել են, որ փետրվարի 14-ին տեղի է ունեցել հանձնաժողովների տեսակոնֆերանսի ձևաչափով հանդիպում, որի մասին ԱԳՆ-ն արդեն հաղորդագրություն տարածել է, միաժամանակ, հղում անելով 2023 թ-ի դեկտեմբերի 14-ին հաստատված աշխատակարգի 3.4-րդ կետերին՝ հայտնել են նաև, որ հանձնաժողովների ներկայացրած պետությունների պաշտոնատար անձանց ցանկացած պաշտոնական հղում նիստերի և համատեղ աշխատանքային հանդիպումների արդյունքներին, որը դուրս է ԶԼՄ-ների համար հաղորդագրությունների բառացի բովանդակությունից, ինչպես նաև դրանց պարզաբանումները կամ մեկնաբանությունները չեն թույլատրվում և համարվում են անվավեր»։

Արդյունքում, փոխվարչապետի գրասենյակը պարզապես հրաժարվել է պատասխանել մեր որևէ հարցի՝ հղում անելով աշխատակարգին և նախօրեին ԱԳՆ-ի հրապարակած հաղորդագրությանը, որից տպավորություն է ստեղծվում, որ օնլայն հարթակում հանդիպել են՝ որոշելու, թե երբ են հանդիպելու հաջորդ անգամ։ Ու միայն սա։

Մինչդեռ Տավուշի մեր բնակիչներն ահազանգում են, որ ապրիլին Ոսկեպարի վերեւի հատվածըն արդեն պետք է հանձնվի։ Այն, որ այս պահին ակտիվ ականազերծման աշխատանքներ են ընթանում, վկայում է, որ կողմերը համաձայնություն ունեն, թե ինչ տարածք է հանձնելու Հայաստանը, սակայն կառավարությունը գործում է ժողովրդի թիկունքում ու գաղտնի պահում ամեն ինչ։

Նկատենք, որ ադրբեջանական լրահոսում տեղեկություններ չկան ականազերծման աշխատանքների մասին, ինչից հետեւում է, որ Բաքուն օկուպացված տարածքներ վերադարձնելու խնդիր չունի ու խոսքը գնում է միայն հայկական կողմի հերթական զիջումների մասին։