Հանցագործության մասին հաղորդում եմ ներկայացնում Դատախազություն և ԱԱԾ, տրանսպորտից հավաքագրված մոտ 40% գումարը կորել է. Մեսրոպ Մանուկյան

Ես հանցագործության մասին հրապարակային հաղորդում եմ ներկայացնում Դատախազություն և ԱԱԾ. լրագրողների հետ զրույցում հայտարարեց Երևանի ավագանու «Մայր Հայաստան» խմբակցության անդամ Մեսրոպ Մանուկյանը։

«Եթե չի գործում համակարգային կոռուպցիա, եթե չկա թալան և ձեզ փայ չեն հատկացնում, ուրեմն սա հանցագործության մասին հաղորդում է»,-ասաց նա։

Մանուկյանը նկատեց՝ մասնավորը դուրս է եկել գծերից, շարժակազմն ավելացել է, որի արդյունքում նվազագույն մուտքերը 20 տոկոսով պետք է ավելանային, սակայն հակառակն է տեղի ունեցել։

Նա մեջբերեց հրապարկված թվերը և նշեց, որ տրանսպորտից հավաքագրված մոտ 40 տոկոս գումարը կորել է և, իր գնահատմամբ, դա տեխնիական խնդիր չէ։

«Վերջին երկու նիստում խուսափում են թվեր հրապարակել, բայց անցյալ տարվա նույն ժամանակի համեմատ 70 տոկոս է իրենց մուտքը եղել, այսինքն՝ 30 տոկոս թերացում է եղել, այն դեպքում, երբ կանխիկ գումար չկա»,-ասաց նա։

Մանուկյանը նշեց, որ այս ստվերի ու թալանի պատասխանատուն Երևանի փոխքաղաքապետ Սուրեն Գրիգորյանն է, իսկ գումարը հավաքագրում է Թելսելը։

Մանուկյանի ներկայացմամբ՝ ըստ հրապարկված թվերի՝ 5 օրում 440 000 ուղևոր է եղել, և հավաքագրված գումարը կազմում է 220 մլն դրամ․

«2 օրը 44 մլն դրամ է կազմում, այսինքն՝ իրենց ասած թվերով, պետք է հավաքագրում ունենան 264 մլն, սակայն այս մարդիկ հավաքել են 90 մլն։ Իրենք արձանագրում են 440 000 ուղևոր, եթե արձանագրում եք, բայց փողը չեք կարում հավաքել, ուրեմն թալանում եք»։