Պանամայի նախագահը հայտարարել է, որ չի զիջի Պանամայի ջրանցքի վերահսկողությունը ԱՄՆ-ին, ինչպես որ ցանկանում է Թրամփը

Պանամայի նախագահ Խոսե Ռաուլ Մուլինոն հայտարարել է, որ Պանամայի ջրանցքը կմնա իր երկրի վերահսկողության տակ։ Նրա հայտարարությունը հաջորդել է ԱՄՆ նախագահ Դոնալդ Թրամփի՝ երդմնակալությունից հետո առաջին ելույթում այն հայտարարությանը, որ «ԱՄՆ-ն պետք է հետ վերցնի ջրանցքի նկատմամբ վերահսկողությունը»։

«Պանամայի Հանրապետության և նրա ժողովրդի անունից ես պետք է կտրականապես մերժեմ նախագահ Դոնալդ Թրամփի երդմնակալության ուղերձում արված հայտարարությունները Պանամայի և նրա ջրանցքի վերաբերյալ... Ջրանցքը եղել և մնում է Պանամայի մաս, դրա կառավարումը կմնա Պանամայի վերահսկողության տակ՝ խստորեն հարգելով դրա մշտական ​​չեզոքությունը»,- գրել է Խոսե Ռաուլ Մուլինոն X սոցիալական ցանցում։

Նա ընդգծել է, որ աշխարհում չկա մի երկիր, որը կխանգարի Պանամայի իշխանությունների գործունեությանը։ Նրա խոսքով՝ երկխոսության համար միշտ տեղ կա, սակայն Պանամայի ջրանցքի նկատմամբ ինքնիշխանությունն ու սեփականությունը մնում են Պանամայինը։

Նախագահ Թրամփն իր խոսքում հայտարարել էր, որ Պանաման «խախտել է» չեզոք մնալու խոստումը` պնդելով, որ «Չինաստանը շահագործում է Պանամայի ջրանցքը»:

«Ամերիկյան նավերը խիստ գերծանրաբեռնված են և ոչ մի կերպ կամ ձևով արդարացի վերաբերմունք չեն ստանում, և դա վերաբերում է Միացյալ Նահանգների նավատորմին ևս: Եվ առաջին հերթին Չինաստանն է շահագործում Պանամայի ջրանցքը, և մենք այն չենք տվել Չինաստանին, մենք տվել ենք Պանամային, և մենք այն հետ ենք վերցնում», - ասել էր Թրամփը:

Անցյալ տարեվերջին Դոնալդ Թրամփը Պանամայի իշխանություններից պահանջել էր նվազեցնել տարանցիկ վճարները Պանամայի ջրանցքով ամերիկյան ռազմական և առևտրային նավերի անցման համար։ Հակառակ դեպքում, ըստ Թրամփի, Պանաման ստիպված կլինի ջրանցքը վերադարձնել ԱՄՆ-ին։ Խոսե Ռաուլ Մուլինոն ասել էր, որ զիջումների չի գնա Պանամայի ջրանցքով ամերիկյան նավերի անցման համար վճարների նվազեցման հարցում։