Հռոմի պապն աղոթել է Կալիֆոռնիայում հրդեհի զոհերի եւ փրկարարների համար
Հռոմի պապ Ֆրանցիսկոս Առաջինը աղոթում է զոհերի եւ փրկարարների համար, որոնք փորձում են հաղթահարել Կալիֆոռնիայում անտառային հրդեհները, որոնց հետեւանքով զոհվել է առնվազն 11 մարդ եւ ավերվել են հազարավոր տներ, հայտնել է Reuters-ը՝ հղում կատարելով Վատիկանին։
«Նորին Սրբություն Հռոմի պապ Ֆրանցիսկոսը հավաստիացնում է ձեզ եւ այս ողբերգությունից տուժած համայնքին իր հոգեւոր մտերմության մասին»,- նշվել է Հռոմի պապի անունից Լոս Անջելեսի արքեպիսկոպոս Խոսե Գոմեսին ուղարկված հայտարարությունում:
Իր «անկեղծ ցավակցությունը» հայտնելով նրանց, «ովքեր սգում են իրենց կորուստը»՝ Ֆրանցիսկոսը նաեւ աղոթել է «շտապ ծառայությունների ջանքերի համար» եւ փոխանցել «իր օրհնությունը բոլորին՝ որպես Տիրոջ մխիթարության եւ ուժի գրավական»։
LA Catholics կայքի տեղեկացմամբ՝ Լոս Անջելեսում է գտնվում Միացյալ Նահանգների ամենամեծ կաթոլիկ համայնքը:
Երեքշաբթի օրվանից վեց միաժամանակյա անտառային հրդեհներ ավերել են Լոս Անջելեսի օկրուգի որոշ հատվածներ՝ ստիպելով տարհանել մոտ 153 հազար մարդու, եւ ոչնչացրել 14 100 հեկտար, ինչը 2,5 անգամ մեծ է Մանհեթենի մակերեսից:
Հետևեք մեզ Viber-ում
