Ունեինք ինֆորմացիա, որ հնարավոր է Արթուր Վանեցյանը ևս ձերբակալվեր. Բաբայան
Ունեինք ինֆորմացիա, որ հնարավոր է Արթուր Վանեցյանը ևս ձերբակալվեր, եթե լիներ մեքենայում և դրանով էր պայմանավորված, որ նա մեզ հետ չէր։ Ամեն դեպքում, վստահ ենք, որ ոստիկանության այդ ապօրինի գործողության միակ նպատակն էր անհարմարություններ պատճառել, քաղաքական ընդդիմադիրի նկատմամբ ինչ-որ պրոցեսներ իրականացնել։ «Փաստինֆո»-ի հետ զրույցում ասաց իրավապաշտպան Արսեն Բաբայանը, ում երեկ քրեական ոստիկանությունը ձերբակալել էր իր ընկերների հետ՝ ապօրինի զենք պահելու անհիմն կասկածանքով, ապա ազատ արձակել։
Դեպքի ժամանակ նրանք գտնվել են «Հայրենիք» կուսակցության նախագահ Արթուր Վանեցյանին սպասարկող ավտոմեքենայում։
Ա. Բաբայանի դիտարկմամբ՝ ոստիկանները չէին կանխատեսել, որ ինքը եւս կարող է լինել այդ մեքենայի մեջ։ «Այն, ինչ երեկ դրեցինք իրենց գլխին, դժվար թե նորից անեն, բայց եթե անեն, ապա ավելի դաժան ենք լինելու»,- նշեց Ա.Բաբայանը՝ ավելացնելով, որ հունվարի 10-ին ոստիկանության իրականացրած գործողությունը՝ ԱԱԾ նախկին պետ, «Հայրենիք» կուսակցության առաջնորդ Արթուր Վանեցյանի աշխատակիցների նկատմամբ առաջին դեպքը չէր և հենց դա էր պատճառը, որ ձեռնարկեցին երեկվա պատասխան գործողություններն ու աղմուկը։
Ա. Բաբայանը նշեց, որ ի սկզբանե կանխատեսել էին ոստիկանների գործողությունները, բայց վերջիններս չէին նախատեսել, որ ավտոմեքենայի մեջ կլինի նաեւ Արսեն Բաբայանը։
Նշենք, որ «ձերբակալելու» օպերացիան իրականացնելիս ոստիկաններն ասել էին, թե կասկածում են ապօրինի զենք-զինամթերք պահելու մեջ, սական հետագա գործողությունները վկայել են, որ դա ընդամենը եղել է պատճառաբանություն՝ քաղաքական գործչի թիմակիցների նկատմամբ «մասկի շոու» կազմակերպելու համար։ Քանզի ոչ մեկի մոտ էլ չի եղել ապօրնի զենք, իսկ Ա. Բաբայանի ձերբակալությունը փորձել են ի սկզբանե հերքել՝ պարզելով նրա ինքնությունը։
«Իմ ներկայությունը իրենց գործողություններին խանգարեց։Բոլոր ձերբակալվածներին նույն օրն են բաց թողել, դեռ երեկ, բայց դա չէ խնդիրը, խնդիրն այն է, որ 4-րդ անգամն էր արդեն։ Նույն սցենարով այս տղաներին ձերբակալում են, տանում 6 ժամ պահում են, թողնում են ու գիտեն, որ որևէ այլ զարգացում չի կարող լինել»,- նշեց Արսեն Բաբայանը։
Ըստ նրա՝ ոստիկանները թատրոն են սարքում, մինչդեռ մարդուն առանց որեւէ իրավական հիմքի բերման ենթարկելը ապօրինի գործունեություն է, մարդու իրավունքների դասական խախտում, որովհետև չես կարող մարդուն 6 ժամ հենց այնպես ազատազրկել։ «Սա նաև քաղաքական հետապնդման դասական օրինակ է ՝ առանց հիմնավոր պատճառի կամ հնարված պատճառով անձին մեկուսացնելը՝ որոշակի այլ նպատակներից ելնելով։Ընդ որում երեք ժամ էլ չէ, վեց ժամ անպայման պահում են, որևէ քրեական գործ չեն հարուցում», - ասաց Բաբայանը։
Աղբյուր` Փաստինֆո
Հետևեք մեզ Viber-ում
