Վարկեր ունեցող քաղաքացիներն աջակցություն կստանան. որ դեպքում

Կառավարությունը հավանություն տվեց ՀՀ աշխատանքի և սոցիալական հարցերի նախարարության ներկայացրած նախագծին, որով նախատեսվում է առնվազն 3 տարի անհուսալի դասակարգված վարկեր ունեցող անձանց աշխատավարձից հաշվարկվող եկամտային հարկն ուղղել վարկի մարմանը, սակայն քաղաքացու վարկերի մայր գումարները միասին չպետք է գերազանցեն 1 մլն դրամը:

Բացի այդ, շահառու ճանաչվելու դեպքում աշխատավարձից բռնագանձվող գումարի չափը ներկայիս մինչև 50 տոկոսի փոխարեն կսահմանվի 20 տոկոս:

Որոշումն ուժի մեջ է մտնելու 2025 թվականի փետրվարի 1-ից։

Կենտրոնական բանկի նախագահ Մարտին Գալստյանն ասաց, թե բանկերը տույժ-տուգանքները 80 տոկոսով զիջելու են։

«Ինչո՞ւ ենք 80 տոկոսով զիջում, այլ ոչ թե 100, որովհետև զիջելու ժամանակ առաջանալու է 20 տոկոսի չափով հարկային պարտավորություն, այսինքն՝ բանկերն ամբողջությամբ են զիջում, 20 տոկոսն էլ տալու են պետությանը»,- մանրամասնեց ԿԲ նախագահը։

Կստեղծվի թվային հարթակ, որով մարդիկ կարող են դիմել Աշխատանքի և սոցիալական հարցերի նախարարություն, ասել, որ ցանկանում են մասնակցել ու դառնալ ծրագրի շահառու։