Նախկին իշխանության պատգամավոր Արման Սահակյանի «մարդը» Գյումրիում մասնակցում է Նիկոլ Փաշինյանի «փրայմերիզին». ի՞նչ գործարք է տեղի ունեցել
Գյումրիում տևական ժամանակ է քաղաքի կառավարման ճգնաժամ է առաջացել: Պատճառը Նիկոլ Փաշինյանն է, ով խնդիր է դրել հերթական ապօրինությամբ զավթել տեղական իշխանությունը:
Ինչպես հայտնի է, Գյումրիում «Բալասանյան» դաշինքը 2021թ. ընտրություններից հետո կոալիցիա էր կազմել «Քաղաքացիական պայմանագրի» հետ: Վերջինս ամիսներ առաջ որոշեց դուրս գալ կոալիցիայից: Դրանից հետո գործի դրվեցին կուլիսային բռնաճնշումների ու ահաբեկումների գործիքակազմերը: Արդյունքում «Բալասանյան» դաշինքն ամբողջ կազմով վայր դրեց մանդատը և հիմա Գյումրիի ավագանին չի կարողանում նիստ գումարել ու նոր քաղաքապետ ընտրել: Օրենքի համաձայն պետք է տեղի ունենային ավագանու արտահերթ ընտրություններ, բայց Նիկոլ Փաշինյանը վախեցավ անխուսափելի պարտությունից և հիմա ուզում է Գյումրիի քաղաքապետի պաշտոնակատար նշանակել: Իր այդ միանձնյա որոշումը կյանքի կոչելու համար նույնիսկ օրենք են փոխում:
Փաշինյանը վախեցավ ընտրություններից, քանզի գիտի, որ գյումրեցիները մերժում են ՔՊ-ին: Բացի այդ՝ Նիկոլի թիմում գզվռտոց է և ՔՊ-ն չունի թեկնածու: Ահա այս հանգամանքները հաշվի առնելով՝ Ն. Փաշինյանը դիմել է կեղծ ժողովրդավարական քայլի: Հայտարարել է «նախնական ընտրություններ»՝ «պրայմերիզ»: Ինքն ուզում է ՔՊ-ականների միջև մրցույց կազմակերպել ու նոր միայն պաշտոնակատարի նշանակել, թեև իր մտքում արդեն ունի իր կամ իր կնոջ սրտի թեկնածուին: Բայց որպեսզի պառակտվող ՔՊ-ում է՛լ ավելի չխորանա կոնֆլիկտը, որոշել է կեղծավորաբար գյումրեցիների անունից նշանակել քաղաքապետի պաշտոնակատար:
Հետաքրքիրն այն է, որ Նիկոլի այդ «պրայմերիզին» մասնակցում է նաև «Լուսավոր Հայաստանը» ներկայացնող, Գյումրիի սոցապի տնօրեն և ՀՀԿ ցուցակով նախկինում պատգամավոր դարձած ոչ անհայտ Արման Սահակյանի մտերիմ ընկեր Սարիկ Մինասյանը: Գյումրիում խոսում են, որ առանց Արման Սահակյանի աջակցության Սարիկ Մինասյանը, ով ևս նախկինում պատգամավոր է եղել, տխրահռչակ Էդմոն Մարուքյանի ցուցակով, չէր մասնակցի Նիկոլ Փաշինյանի բեմադրությանը:
Դա նշանակում է, որ գործարար, «Շիրակ» ֆուտբոլային ակումբի ղեկավար Արման Սահակյանի ու ՔՊ-ի միջև երկխոսություն, պայմանավորվածություն կա: Իսկ թե ինչ է դա նշանակում, դժվար չէ գնահատել:
Հետևեք մեզ Viber-ում
