Ինչու՞ հանկարծ համայնքապետի ԺՊ թեկնածուն պետք է լինի հենց ՔՊ կամ ՔՊ-ի համակիր․ Արմենուհի Կյուրեղյան
ԱԺ «Հայաստան» խմբակցության պատգամավոր Արմենուհի Կյուրեղյանի խոսքը՝ «Խորհրդարանական շաբաթ» հաղորդման շրջանակում․
«Սիրելի հայրենակիցներ,
Ես այսօր ուզում եմ խոսել Գյումրիում ստեղծված իրավիճակի մասին:
«Բալասանյան դաշինքը» ՔՊ-ի խարդավանքների արդյունքում վայր դրեց մանդատները: Այսօր ավագանին ունի 19 մանդատ, կեսից ավելին, և ըստ էության, կարող է շարունակել իր գործունեությունը, նիստ հրավիրել, քաղաքապետի նոր թեկնածու առաջադրել և քաղաքը հանել կառավարման ճգնաժամից: Սակայն ՔՊ խմբակցությունը հայտարարեց, որ իրենք համայնքի ղեկավարի թեկնածու չեն առաջադրի և կգնան արտահերթ ընտրությունների: Ինչու՞:
Միգուցե, ըստ օդում կախված, մամուլում տարածված լուրերի, Նիկոլ Փաշինյանը և Աննա Հակոբյանը ուզում են, որ Գյումրիում համայնքի ղեկավարը ոչ միայն ՔՊ-ից լինի, այլ նաև հենց Աննա Հակոբյանի բարեկամը լինի: Մի գուցե, ՔՊ-ի ներսում առաջացել են տարաձայնություննե՞ր այդ թեկնածուի շուրջ: Հիշենք նաև, որ մինչ այդ հայտարարված ԱԺ պատգամավոր Կարեն Սարուխանյան թեկնածուի թմրաթեստի արդյունքները մի ուրիշ աղմուկ էին բարձրացրել: Եվ հիմա այդ թնջուկը լուծելու համար ՆՓ-ն լայվով հայտարարում է փրայմերիզի մասին:
«Բոլոր մասնագետներն ասում են, որ Գյումրիում հաստատված կառավարման ճգնաժամը հնարավոր չի լինելու հաղթահարել առանց վարչապետի միջամտության, և այդ միջամտությունը կայանալու է հետևյալում․ առաջիկայում ընդունվելիք օրենսդրական փոփոխությունների արդյունքում ես պետք է Գյումրիում քաղաքապետի ժամանակավոր պաշտոնակատար նշանակեմ»: Այսինքն, այս մարդն արդեն որոշել է, որ օրենքի փոփոխությունն ընդունվելու է: Բա էլ ՔՊ պատգամավորներին, ինչպես կասեր Վահագն Ալեքսանյանը, ուսապարկի տեղ դնելը ո՞նց է լինում:
Շարունակեմ լայվից.
«Այդ նպատակով առաջիկայում Գյումրիում տեղի կունենա նախնական ընտրություն՝ «փրայմերիզ»: Նախ հիշեցնեմ, որ փրայմերիզը որևէ պաշտոնի համար առաջադրվող թեկնածուի ներկուսակցական ընտրություն է: Փաստորեն, իրենց կուսակցության ներսում անհամաձայնությունների թնջուկի լուծումը ՆՓ-ն փորձում է գյումրեցուն վաճառել որպես ժողովրդավարության դրսևորում և իր թիմին պարտադրելու է իր սրտի ուզած թեկնածուին:
Ըստ էության, վարչապետի այդ լայվը ծայրից ծայր իր լիազորությունների չարաշահման մասին է: Վարչապետը չի կարող խոսել դեռևս ԱԺ-ի կողմից չընդունված օրենքի, իրեն տված նոր լիազորության մասին՝ որպես փաստ:
Հաջորդը, ինչու՞ հանկարծ համայնքապետի ԺՊ թեկնածուն պետք է լինի հենց ՔՊ կամ ՔՊ-ի համակիր, չէ՞ որ գյումրեցին ՏԻՄ ընտրության ժամանակ այլ ուժի է ընտրել:
Որպես ամփոփում,
ՆՓ-ն փաստում է, ինքը անտեսում է ընտրությունների արդյունքները և նշանակում է իր սրտի ուզած համայնքի ղեկավարներ կամ ԺՊ-ներ, ինչպես դա արվեց Վանաձորում, Ալավերդիում, Ախուրյանում և այլուր: Բա էլ ժողավրդավարության բաստիոնը ո՞նց է լինում»:
Հետևեք մեզ Viber-ում
