Աղվան Հովսեփյանի գործով տուժողը ճնշել է վկային

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի գործով որպես տուժող ճանաչված Վարշամ Ղարիբյանը, որը հայտնի է որպես «Շանթի Յուրա» ճնշել է գործով վկա Հովհաննես Եղիազարյանին` պահանջելով ցուցմունք տալ Հովսեփյանի դեմ: Այս մասին այսօր տեղի ունեցած դատական նիստի ընթացքում հայտնեց գործով վկա Մանվել Ղարիբյանը` Վարշամ Ղարիբյանի եղբայրը:

Նա պատմեց Հովհաննես Եղիազարյանի կողմից իրեն փոխանցված խոսքերը, որ դատական նիստերից մեկի ընթացքում Վ. Ղարիբյանը բարկացած դուրս է եկել նիստերի դահլիճից, անպատվել, ում` հայտնի չէ, և միջանցքում գտնվող Հովհաննես Եղիազարյանին ասել ցուցմունք տալ և ասել, թե Աղվան Հովսեփյանն է կարճել իր վերաբերյալ քրեական գործը: Հովհաննես Եղիազարյանն էլ, որը Ղարիբյան եղբայրների ազգականն է, ըստ Մանվել Ղարիբյանի, պատասխանել է` նման տեղեկություն չունի: Վկայի այս հայտարարությունը դատարանն առաջարկեց գնահատել որպես հանցագործության մասին հաղորդում, նշեց, որ եթե դատախազը դիտարկի որպես հաղորդում, ապա դատարանը կտրամադրի նիստի արձանարության կրիչը:

Միևնույն ժամանակ, վկային նախազգուշացում տրվեց` սուտ մատնության հետևանքների և քրեական պատասխանատվության մասին: Վկան պնդեց իր խոսքերը:

Աղբյուր` Փաստինֆո