Աննա, բա մյուս նկարնե՞րն ուր են. փոքր մարդկանց մեծ բարդույթը. 168.am
Երբ Նիկոլ Փաշինյանը դեռ ընդամենը «Հայկական Ժամանակ» ընտանեկան թերթի ազատազրկված սեփականատեր էր, իսկ կինը՝ Աննա Հակոբյանը, նույն այդ թերթի խմբագիր, իրենց թերթում հաճույքով հրապարակում էին իրենց լրագրող, իսկ ներկայումս Հանրային հեռուստաընկերության «Լուրեր» ծրագրի տնօրեն Լուսինե Բարսեղյանի «Սպանելու հաճույքը» վերտառությամբ նյութը, որի բովանդակությունն արդեն երկու տարի ՀՀ նախագահի աթոռը չզբաղեցնող Ռոբերտ Քոչարյանի և նրա որդու՝ Սեդրակ Քոչարյանի աֆրիկյան հանգիստն էր կամ նրանց մասնակցությամբ սաֆարին:
Զանգահարել էին Նամիբիա և Տանզանիա, ճշտել բոլոր արժեքներն ու այդ թեման դարձրել իրենց հետագա տարիների գործունեության թոփ թեման՝ Քոչարյանն առյուծ է սպանել: Կրկին շեշտենք, Ռոբերտ Քոչարյանն այդ ժամանակ արդեն պաշտոնաթող նախագահ էր: Լուսինե Բարսեղյանի՝ 2010թ. գրած նյութը, ի դեպ, «Հայկական ժամանակը» վերահրապարակել էր նաև 11 տարի անց՝ 2021թ… Ուրեմն պետք էր…
Անցան տարիներ: Նիկոլ Փաշինյանի դրսի տերերը նրան բերեցին իշխանության, և նա արդեն վարչապետի կարգավիճակով էր թեման տաք պահում՝ արդեն իսկ 2021թ. խորհրդարանական արտահերթ ընտրությունների քարոզարշավի ժամանակ:
Ռոբերտ Քոչարյանի լուսանկարը ձեռքին՝ Նիկոլ Փաշինյանը շրջում էր գյուղերով ու ցույց տալիս գյուղերի բնակիչներին՝ նրանց համար հաջողությամբ կերտելով ահարկու գալիքի կերպար… Աշխատեց… Եվ դա այն ժամանակ, երբ արդեն տեղի էր ունեցել 44-օրյա ողբերգական պատերազմը, երբ կորցրել էինք Արցախի զգալի մասը, շուրջ 5000 երիտասարդ կյանքեր, որոնց ամբողջական ցուցակը մինչ այսօր հրապարակված չէ, ավելին, երբ արդեն 1 ամիս էր, օկուպացված էր Գեղարքունիքի մարզի մի հատվածը… Ի դեպ, մինչ օրս: Բայց մարդիկ իրական սպառնալիքը թողած՝ իրենց համար երևակայական սպառնալիք էին ստեղծում ու տանուլ տալիս կյանքեր, երկիր ու պետություն…
Անցավ էլի երեք տարի: Նիկոլ Փաշինյանը նախ Արցախը թղթով Պրահայում հանձնեց թշնամուն, ապա հայաթափեց ու կարմիր ժապավենով նվիրեց Ադրբեջանին: Բայց այդ մարդը դեռ վարչապետ է, ու գործող վարչապետի կինն ու դուստրը նոյեմբերի 9-ին՝ 44-օրյա պատերազմի ողբերգական ավարտի, Արցախի կապիտուլյացիայի ստորագրման օրը, երբ Եռաբլուրում ողջ օրը ողբ էր ու հեկեկոց, հրապարակում են լուսանկարներ ու տեսանյութեր իրենց աֆրիկյան հանգստից, այդ թվում՝ սաֆարիից:
Այստեղ նիկոլական քարոզիչները կարող են հակադարձել, թե սաֆարի չի եղել, ընդամենը հանգստացել են բոլորիս հաշվին, սակայն Աննա Հակոբյանի լուսանկարն իր կողքով զենքով քայլող սևամորթ ուղեկցորդի հետ ինքնին խոսուն է: Պարզապես շրջահայացորեն երևի ոչ բոլոր լուսանկարներն են հրապարակվել;
Ի դեպ, Աննա Հակոբյանի ու նրա ուղեկիցների հագուկապն ամբողջովին քոփի փասթ էր արված ԱՄՆ առաջին տիկին Մելանյա Թրամփի համանման լուսանկարներից: Ֆեյսբուքյան օգտատերերն էին ֆիքսել:
Նոյեմբերի 9-ի՝ հայերիս համար ողբերգական օրը շատերը գրեցին ու խոսեցին աֆրիկյան լուսանկարները հրապարակողների բարոյական ցածրագույն նշաձողի մասին, բայց այդ մարդիկ, պարզվում է, նաև մեծ բարդույթներ ունեն: Աֆրիկայում սաֆարիի դեռ չէին մասնակցել… Մասնակցեցին…
Հ.Գ. Հավաքական Փաշինյանենք 2010թ. իրենց կայքում պաշտոնաթող նախագահին հռետորական հարց էին ուղղում՝ որտեղի՞ց Ռոբերտ Քոչարյանին այդքան փող: Հարցը վերահասցեագրելով՝ որտեղի՞ց Աննա Հակոբյանին այդքան փող:
Հետևեք մեզ Viber-ում
