Իրանի վարչակարգը չի հասկանում մեր վճռականությունը. ով հարձակվի մեզ վրա, մենք կհարձակվենք նրանց վրա

Իրանական մի շարք կարևոր ենթակառուցվածքային օբյեկտներ կարող են իսրայելական հարվածների թիրախ դառնալ՝ ի պատասխան Իսրայելի վրա Իրանի հրթիռային հարձակումների, հայտնում է Axios-ը։

Իսրայելի պաշտոնյաները պորտալին հայտնել են, որ Իսրայելը զգալի պատասխան հարված կհասցնի, որը կարող է ուղղված լինել Իրանի նավթի արդյունահանման օբյեկտներին և ռազմավարական այլ վայրերին: Նրանք նշել են, որ կդիտարկվեն բոլոր տարբերակները, այդ թվում՝ իրանական միջուկային կենտրոններին հարվածելու հնարավորությունը։

Axios-ը նշում է, որ իսրայելցիները կարող են պատասխանել ինչպես օդային հարվածներով, այնպես էլ գաղտնի գործողություններով, որոնք նման են երկու ամիս առաջ Թեհրանում ՀԱՄԱՍ-ի առաջնորդ Իսմայիլ Հանիյեի սպանությանը:

«Իրանը մեծ սխալ է թույլ տվել, և նա կվճարի դրա համար»,-ասել է Իսրայելի վարչապետ Բենիամին Նեթանյահուն` ըստ պորտալի։

Նրա խոսքով՝ Իրանի հարձակումը ձախողվել է, քանի որ այն հետ է մղվել իսրայելական հակաօդային պաշտպանության համակարգի կողմից՝ ԱՄՆ-ի աջակցությամբ։

«Իրանի վարչակարգը չի հասկանում մեր վճռականությունը՝ պաշտպանվելու և մեր թշնամիների դեմ հակահարված տալու», - ասել է Իսրայելի վարչապետը։

«Մենք հավատարիմ կմնանք մեր սահմանած կանոնին՝ ով հարձակվի մեզ վրա, մենք կհարձակվենք նրանց վրա»,- հավելել է նա։

ՄԱԿ-ում Իսրայելի մշտական ներկայացուցիչ Դենի Դանոնն իր հերթին ասել է, որ «Իրանն իրականացրել է մինչ օրս Իսրայել պետության դեմ ամենամեծ և ամենադաժան հրթիռային հարձակումը»։

«Մի բան կարող եմ ասել՝ Իսրայելի պատասխանը կլինի նկատելի ու ցավոտ»,- լրագրողներին ասել է Դանոնը։

ABC News-ը հայտնում է, որ Իրանը 30 րոպեի ընթացքում երկու ալիքով ընդհանուր առմամբ 220 հրթիռ է արձակել Իսրայելի տարածքի վրա։ Ուղիղ հարվածներ են եղել նաև Թել Ավիվի մոտ։ Հրթիռներից շատերը որսացել են Հորդանանի երկնքում։

Աղբյուր` Փաստինֆո