Լարված իրավիճակ՝ Աբովյանի նախկին «գայի պոստի» հարևանությամբ գտնվող «Զովք» սուպերմարկետի դիմաց

shamshyan.com-ի հաղորդմամբ՝ այսօր՝ սեպտեմբերի 17-ին, լարված իրավիճակ է ստեղծվել Կոտայքի մարզում: Ինչպես դեպքի վայրից հայտնում է ֆոտոլրագրող Գագիկ Շամշյանը, Երևան-Սևան ավտոճանապարհի՝ ժողովրդին հայտնի Աբվոյանի նախկին «գայի պոստի» հարևանությամբ գտնվող «Զովք» և մի քանի խանութների աշխատակիցներ ու տնտեսվարողներ, ինչպես նաև Վերին Պտղնիի բնակիչներ, ի նշան բողոքի փակել են ճանապարհը:

Ֆոտոլրագրողի հետ զրույցում այդ օբյեկտների աշխատակիցներն ու գյուղի բնակիչները պահանջում էին, որպեսզի ՀՀ տարածքային կառավարման և ենթակառուցվածքների նախարարության «Ճանապարհային դեպարտամենտ» ընկերությունը հստակ պատասխանի, թե ինչից ելնելով և ում որոշմամբ է որոշվել, որ պետք է ճանապարհի այդ հատվածում տեղադրվեն երկաթե արգելապատնեշներ, իսկ դա առաջին հերթին խոչընդոտ է հանդիսանաու իրենց համար:«Մի քանի օր է՝ ուզում ենք այդ պատասխանը ստանալ, բայց ոչ ոք հստակ ոչինչ չի ասում:

Քիչ առաջ տեղեկացանք, որ «Ճանապարհային դեպարտամենտ»-ը արդեն հատուկ տեխնիկաներով ժամանել ու իր գործն է անում: Փակվում է նաև գյուղից դուրս եկող մարդկանց ճանապարհը, թե ոնց են էդ մարդիկ անցնելու, չգիտենք»:Ֆոտոլրագրողը հայտնում է, որ իրավիճակը բավականին լարված է, և ժամանել են մեծ թվով ոստիկանության ծառայողներ՝ հիմնականում ոստիկանության Կոտայքի բաժնից և ՀՀ ՆԳՆ ոստիկանության Պարեկային ծառայության Կոտայքի մարզի գումարտակի պարեկները:

Քաղաքացիների ու ոստիկանների միջև տեղի ունեցավ քաշքշուկ և քաղաքացիները, որպես խաղաղ անհնազանդության ակցիա և բողոքի նշան, փակեցին ճանապարհը:Ոստիկանները ուժով բոլորին հեռացրին ճանապարհից, մի քանի հոգու էլ, ըստ հավաքված քաղաքացիները, ոստիկանները բերման են ենթարկել ոստիկանության Կոտայքի բաժին:Այս պահին իրավիճակը լարված է, իսկ բնակիչներն ու ակցիայի մասնակիցներն ասում էին.

«Մենք պարզապես ուզում ենք հստակ իմանալ՝ ինչից ելնելով է որոշվել, որ այդ հատվածն էլ սարքեն Փարաքարի ճանապարհի նման»: Ֆոտոլրագրողը հայտնում է, որ այս հատվածում վերջին ամիսներին այնքան շատ խցանումներ են տեղի ունեցել, ու պատճառը ոչ թե ավտովթարներն են եղել, այլ «Զովք» սուպերմարկետի այցելուների պատճառով, մարդիկ գալիս են այդտեղ գնումներ կատարելու, ավտոմեքենաները որտեղ ուզում, ինչպես ուզում՝ կայանում են, և ստեղծում են արհեստական խցանում. նույնիսկ եղել են դեպքեր, երբ շտապօգնության մեքենաները բուժառուին տեղափոխելիս են եղել ու հայտնվել են խցանման մեջ: Այն, որ «Ճանապարհային դեպարտամենտ»-ը ուզում է խնդիրը լուծել, լավ է, սակայն հաշվի չի առնում այդ հատվածում օբյեկտների աշխատակիցների ու բնակիչների կարծիքը: