ՀՀ ոստիկանապետ Արամ Հովհաննիսյանի որդին զավթել է համայնքային հողը, տիրացել Ոստիկանության կայանատեղիին. «Հետք»

ՀՀ ոստիկանապետ Արամ Հովհաննիսյանի որդին զավթել է համայնքային հողը, տիրացել Ոստիկանության կայանատեղիին, գրում է «Հետքը»:

Կայքը գրում է. «Արտաշատի բաժնի միլիցիոների պաշտոնից իր կարիերան սկսած Արամ Հովհաննիսյանը 2018 թ․-ից հետո թռիչքային առաջխաղացում գրանցեց։ Կոտայքի ոստիկանապետի պաշտոնը զբաղեցնելուց կարճ ժամանակ անց նշանակվեց Արմավիրի ոստիկանապետ, ապա՝ ոստիկանապետի տեղակալ, իսկ 2023 թ.-ից՝ ներքին գործերի նախարարի տեղակալ-ոստիկանության պետ։ Մինչ այդ՝ 2022 թ․-ին, վարչապետ Նիկոլ Փաշինյանի առաջարկությամբ, նախագահ Վահագն Խաչատուրյանն Արամ Հովհաննիսյանին շնորհել է Ոստիկանության գեներալ-մայորի կոչում։

Կարիերային զուգահեռ Ոստիկանապետ, գեներալ-մայոր Արամ Հովհաննիսյանի որդին սեփականաշնորհել է Ոստիկանության կողմից օգտագործվող կայանատեղիի տարածքը, ապա զավթել է Երևան համայնքի հողամասը, ապօրինի շինարարություն արել, որը հետագայում օրինականացրել է։ «Հետքը» պարզել է ոստիկանապետի որդու կատարած ապօրինությունները, բացահայտել համակարգված գործողությունների շղթան։

Ամիսներ առաջ Երևանի Շենգավիթ վարչական շրջանում՝ Գարեգին Նժդեհի 25/8 հասցեում, ավարտին են հասցվել երկհարկանի շինության վերակառուցման աշխատանքները։ Ընդլայնված այդ շինությունը սեփականության իրավունքով պատկանում է Հրաչյա Արամի Հովհաննիսյանին՝ ՆԳ նախարարի տեղակալ-ոստիկանության պետ Արամ Հովհաննիսյանի որդուն։ Կառուցապատող Հրաչյա Հովհաննիսյանը Արտաշատ համայնքի ՔՊ-ական ղեկավարի խորհրդականն է, դրանից առաջ՝ 2021 թ․-ին, ՔՊ-ի ցուցակով ավագանու թեկնածու էր, «Քաղաքացիական պայմանագիր» կուսակցության անդամ է։

2014-2016 թթ.-ին Արամ Հովհաննիսյանը զբաղեցրել է Ոստիկանության Շենգավիթի բաժնի պետի պաշտոնը։ Այդ բաժնի շենքի հարևանությամբ՝ Երևան համայնքի սեփականությունը հանդիսացած մոտ 200 քմ հողամասը տարիներ շարունակ ծառայել է որպես Ոստիկանության Շենգավիթի բաժնի մեքենաների կայանատեղի։ 2015 թ.-ի դեկտեմբերին Երևանի քաղաքապետ Տարոն Մարգարյանի որոշմամբ կայանատեղիի զբաղեցրած հողամասի մի մասն աճուրդով վաճառվել է Շենգավիթի ոստիկանապետի 21-ամյա որդուն՝ Հրաչյա Հովհաննիսյանին։ 81.66 քմ հողամասի մեկնարկային գինն աճուրդում սահմանվել է 2 միլիոն 41 հազար 500 դրամ, որը Հրաչյա Հովհաննիսյանը գնել է 2 միլիոն 143 հազար 575 դրամով։ Հողամասն օտարվել է հասարակական շինություն կառուցելու նպատակով։ 2016 թ․-ին Հրաչյա Հովհաննիսյանը ստացել է շինթույլտվություն և ձեռք բերած հողամասի վրա երկհարկանի շինություն է կառուցել։ Թե ի՞նչ միջոցներով է 21-ամյա Հրաչյա Հովհաննիսյանը հողը ձեռք բերել և նման շինարարություն իրականացրել, հայտնի չէ։

Հասարակական կառույցի սեփականատեր դառնալուց հետո Հրաչյա Հովհաննիսյանը զավթել է նախկին կայանատեղիի մյուս մասը՝ 70քմ և 4քմ հողամասերը, որոնց վրա ապօրինի շինարարություն է իրականացրել։ Մենք կարող ենք ենթադրել, թե ինպես է Երևանի քաղաքապետարանը «վերահսկողություն իրականացրել», որ չկանխվի հողամասի զավթումը։ 2021 և 2022 թթ․-ին Երևանի քաղաքապետեր Հայկ Մարությանն ու Հրաչյա Սարգսյանը որոշել են օրինականացնել Արամ Հովհաննիսյանի որդու ապօրինությունները։ Երևան համայնքի ղեկավարների որոշումներով օրինականացվել են համայնքային հողի վրա ինքնակամ կառուցված շինությունները և ուղիղ վաճառքով օտարվել Հրաչյա Հովհաննիսյանին։ Ընդհանուր 74 քմ հողամասի համար Հովհաննիսյանը Երևան համայնքի բյուջե է վճարել 2 միլիոն 8 հազար 692 դրամ։

Այս տարածքը ձեռք բերելուց հետո Հրաչյա Հովհաննիսյանը կրկին շինթույլտվություն է ստացել և վերակառուցել է արդեն գոյություն ունեցող երկհարկանի շինությունը։ Ընդհանուր առմամբ 156 քմ հողամասի վրա այժմ հասարակական նշանակության երկհարկանի շինություն կա, որտեղ տարբեր տնտեսվարողներ տարածք են վարձակալել և գործունեություն են ծավալում։ Ի միջի այլոց, ոստիկանապետի որդուն պատկանող տարածքում տեղակայված «Ֆոտո ստուդիան» և պատճենահանման կետը, որը Շենգավիթի անձնագրայինի մուտքից մոտ 10 մետր հեռավորության վրա է, փոխկապակցված է Շենգավիթի անձնագրայինի պետի հետ։

Այս փաստերի համադրությունը մեզ թույլ է տալիս ենթադրել, որ Ոստիկանության կայանատեղին և համայնքային հողը իրականում ձեռք է բերել ոչ թե Հրաչյա Հովհաննիսյանը, այլ նրա հայրը՝ ոստիկանապետ Արամ Հովհաննիսյանը։

Մեկնաբանություն և պարզաբանումներ ստանալու նպատակով «Հետքը» գրավոր հարցմամբ դիմեց Ներքին գործերի նախարարի տեղակալ-ոստիկանության պետ Արամ Հովհաննիսյանին։ Ստորեւ՝ նրան ուղղված հարցերը.

2015 թ․-ին Ձեր որդին 21 տարեկան է եղել։ Որտեղի՞ց նրան 2.1 միլիոն դրամ՝ համայնքային 81 քմ հողամասը գնելու համար։ 2015 թ․-ին նա աշխատանք ունե՞ր։

Արդյոք Դու՞ք եք առաջարկել Ձեր որդուն, որ հողամասը գնի կամ այն ձեռք բերվի իր անունով։
Ոստիկանության Շենգավիթի բաժնի՝ որպես կայանատեղի օգտագործած տարածքը, Ձեր որդու անունով ձեռք բերելու ժամանակ Ձեզ չի՞ մտահոգել, որ գործարքի հետևանքով անհարմարություն եք պատճառելու առաջին հերթին ՀՀ ոստիկանությանը, և որ կայանատեղին գնելու որոշումը Ոստիկանության շահերին դեմ է։

Դուք տեղյակ եղե՞լ եք, որ Ձեր որդին հետագայում համայնքային հող է զավթել, որի վրա ապօրինի շինարարություն է իրականացրել։ Որպես իրավապահ կառույցի բարձրաստիճան պաշտոնյա ի՞նչ գործողություններ եք ձեռնարկել Ձեր որդու հակաօրինական վարքագիծը կանխելու՝ համայնքին հնարավոր վնասից պաշտպանելու ուղղությամբ։
Ոստիկանության գեներալ-մայոր Արամ Հովհաննիսյանը, չհերքելով ներկայացված փաստերը, չհակադարձելով մեր հարցման մեջ արված պնդումներին, հայտնել է․ «Ի պատասխան Ձեր գրության՝ խնդրում եմ ընդունել ի գիտություն, որ Ձեր կողմից բարձրացված հարցերից բխող տեղեկատվության տնօրինողը չեմ հանդիսանում։ Տղաս՝ Հրաչյա Արամի Հովհաննիսյանը, չափահաս անձ է, ունի իր եկամտի աղբյուրը, հետևապես առաջարկում եմ, որպես իրավասու սուբյեկտի, հարցերն ուղղել իրեն և ստանալ պատշաճ արձագանք»։

Ոստիկանապետի որդին՝ Հրաչյա Հովհաննիսյանը, «Հետք»-ի հետ զրույցում հայտնեց, որ կայանատեղիի զբաղեցրած հողամասի վաճառքի մասին իմացել է հայտարարությունից, որի համաձայն՝ հողամասը համայնքային է եղել, չի պատկանել Ոստիկանությանը։ Հարցին, երբ հողամասը գնեցիք, Ձեր հայրը Ձեզ չհարցրե՞ց, թե ինչու եք Ոստիկանության կայանատեղին գնել, նա բացասական պատասխան տվեց։ Նրա խոսքով` 81,66 քմ հողամասն անբարեկարգ տարածք է եղել, որտեղ մեքենաներ հնարավոր չէր կանգնեցնել։ Անդրադառնալով սեփականաշնորհած հողատարածքի հարևանությամբ գտնվող համայնքային հողամասը զավթելուն և դրա վրա ապօրինի շինարարության մասին մեր դիտարկմանը՝ Հրաչյա Հովհաննիսյանն ասաց․ «Տվյալ տարածքում աղբ էր կուտակվում, անօթեւան մարդ կար։ Մեր շինության կոնդիցիոները այրվել է մի քանի անգամ՝ այդ մասում կուտակված աղբն այրելու հետևանքով։ Մենք մաքրեցինք տարածքը, որից հետո ինքնակամ կառույցներն օրինականացնելու որոշումը եղավ, օրինականացրինք»։

Հրաչյա Հովհաննիսյանը չի կարծում, որ իր գործողություններով վնաս է հասցրել հոր՝ Ոստիկանության պետի հեղինակությանը։ Իսկ թե ինչ միջոցներով է 2015 թվականին (21 տարեկանում) հողամասը գնել և շինարարություն արել, ոստիկանապետի որդին պատասխանեց, որ ձեռնարկատիրությամբ է զբաղվել, այգիներ ունեն, ինչպես նաև՝ Լանջազատ համայնքի տարածքում հանգստի գոտի-տաղավարներ, որոնց վարձակալությունից եկամուտ են ստացել, իսկ շինարարությունն իրականացրել է վարկային միջոցներով։

դիտվել է 352 անգամ
Լրահոս
Արդեն պարզ է Նիկոլ Փաշինյանի ուղերձի հիմնական ասելիքը․ Արսեն Բաբայան Մոլդովան արգելել է ՔՊ-ական պատգամավորի ավիաընկերության գործունեությունն իր տարածքում Ո՞րն է "հարբեցող ծաղրածու" Նիկոլի խաղաղության խասյաթը Նիկոլ Փաշինյանը Ալիևին զեկուցեց հպատակվելու մասին Պատահական չի ընտրվել «գաղափարախոսական» ուղերձի օրը ՀՀ տարածքում կան փակ և դժվարանցանելի ավտոճանապարհներ Նոր Սահմանադրության ընդունմամբ Փաշինյանն իրականացնում է Ադրբեջանի պահանջը․ քաղաքագետ «2021թ. կեղծ «խաղաղությունով» խաբեց՝ հանձնելով Արցախը և ՀՀ 220 ք/կմ-ը, 2026թ-ին «իրական Հայաստանով» է խաբելու՝ կործանման տանելով այն» Սա այն ամենն է, ինչը պետք է իմանալ ՊՆ-ի ու Գլխավոր շտաբի հեղինակության մասին Ալիևը այսօր հերթական անգամ օկուպացված Ստեփանակերտում է... Հայաստնաի վարչապետը «հանկարծ» հայտարարում է Սահմանադրությունը փոխելու մասին Վարչապետի աշխատակազմը բժշկական խալաթներ է գնել «Սահմանադրությունը փոփոխելու նպատակը երկուսն է». Վարուժան Գեղամյան Նոր սահմանադրության ընդունումը էական է Զինծառայողի մահվան գործով երկու անձ է կալանավորվել. նրանք մեղադրվում են զինվորին ինքնասպանության հասցնելու մեջ Զելենսկին գնահատվեց որպես քաղաքական դիակ. այս շարքում իր հերթին է սպասում նաև Փաշինյանը ՔԿ-ն հաստատում է Ով է Կիևյան կամրջից իրեն ցած նետած տղամարդը և ինչ է թողել մեքենայում Գարիկ Գալեյանին ազատազրկման դատապարտելու վճռի դեմ վերաքննիչ բողոք է ներկայացվել Էրդողանն արդեն իր անձրևանոցի միջոցով մտնում է մեկ այլ աշխարհաքաղաքական միջավայր. թուրքագետ Նիկոլը բազմիցս ապացուցել է, որ չունի արժեքաբանական ու գաղափարական սկզբունք․ ՀՀԿ խորհրդի անդամ Ինչո՞ւ եք այլանդակում քաղաքի փողոցները․ Հրայր Կամենդատյան Ջրաhեղձ եղած տղամարդու մարմին են գտել․ մանրամասներ
Ամենաընթերցվածները
Շուտով
Փետրվարի 20-ին, ժամը 15:00-ին Հայելի ակումբի հյուրն է Երվանդ Բոզոյանը Փետրվարի 20-ին, ժամը 14:00-ին Հայելի ակումբի հյուրն է Արա Վարդանյանը Փետրվարի 20-ին, ժամը 13:00-ին Հայելի ակումբի հյուրն է Նաիրա Զոհրաբյանը Փետրվարի 19-ին, ժամը 15:30-ին Հայելի ակումբի հյուրն է Թաթուլ Պետրոսյանը Փետրվարի 19-ին, ժամը 13:00-ին Հայելի ակումբի հյուրն է Նարինե Դիլբարյանը Փետրվարի 19-ին, ժամը 12:00-ին Հայելի ակումբի հյուրն է Աննա Մկրտչյանը Փետրվարի 18-ին, ժամը 12:00-ին Հայելի ակումբի հյուրն է Արմինե Ադիբեկյանը Փետրվարի 18-ին, ժամը 15:00-ին Հայելի ակումբի հյուրն է Ձյունիկ Աղաջանյանը Փետրվարի 18-ին, ժամը 13:00-ին Հայելի ակումբի հյուրն է Վոլոդյա Հովհաննիսյանը Փետրվարի 17-ին, ժամը 14:00-ին Հայելի ակումբի հյուրն է Հրանտ Բագրատյանը
Հետևեք մեզ Viber-ում https://cutt.ly/5wn8sJBS
Hayeli.am