Ջերմուկը ոտքի է կանգնում, այս պահին անվտանգ է, բայց եթե մարդիկ վախենում են այստեղ հանգստանալ… հաշվի առնելով ժամանակները, Երևանի կենտրոնում էլ անվտանգ չէ. Ջերմուկի փոխհամայնքապետ

2022 թվականի սեպտեմբերի 13-14-ը Հայաստանի ուղղությամբ Ադրբեջանի սանձազերծած պատերազմական գործողությունների արդյունքում Ադրբեջանի զինված ուժերի հսկողության տակ անցան հայկական որոշ տարածքներ՝ ինչպես Սյունիքում, այնպես էլ՝ Վայոց ձորում ու Գեղարքունիքում։ Թշնամին այդ ժամանակ դիրքավորվեց Ջերմուկի տարածքում։

Ադրբեջանի հարձակման ժամանակ Ջերմուկ քաղաքում հանգստանում էին հազարավոր զբոսաշրջիկներ, այդ թվում՝ արտերկրից։ Թշնամին երբ կրակել էր քաղաքի ուղղությամբ, զբոսաշրջիկներին տարհանել էին, հարձակման ժամանակ Ջերմուկում եղել էր նաև արտասահմանցի լրագրող, որ օրեր անց կադրեր էր հրապարակել։

Ադրբեջանի ռազմական գործողությունների հետևանքով Ջերմուկում վնասվել էին ոչ միայն շենք-շինություններ, այլ նաև ճոպանուղին, որը մինչև այսօր չի վերականգնվել:

168.am-ի հետ զրույցում Ջերմուկի փոխհամայնքապետ Վարդան Սարգսյանն ասաց, որ չնայած դրան Ջերմուկն աստիճանաբար ոտքի է կանգնում, և նախորդ տարվա համեմատությամբ՝ այս տարի Ջերմուկում զբոսաշրջիկների թիվը որոշ չափով ավելացել է։

«2022 թվականի ագրեսիայից հետո, թշնամու կողմից այս ուղղությամբ որևէ ագրեսիա չի եղել։ Նախորդ տարվա համեմատ, այս տարի զբոսաշրջիկների թիվը կտրուկ ավելացել է, իհարկե, չունենք այն թիվը, որը ցանկանում ենք, բայց հուսանք, որ աստիճանաբար այցելուների թիվը կավելանա, աճը նկատելի է։

Ջերմուկը ոտքի է կանգնում, ցանկալի է, որ այդ ամենն ավելի արագ տեղի ունենար, բայց դե հասկանալի է, այստեղ այցելելու համար ՀՀ մեր քաղաքացիների մեջ դեռևս որոշակի էմոցիաներ կան, որոնք մնացել են 2022 թվականի սեպտեմբերի 13-ից հետո, որոնք դեռ պետք է հաղթահարել»,- նշեց Ջերմուկի փոխհամայնքապետը։

Նրա փոխանցմամբ՝ այս պահին քաղաքում առողջարաններ կան, որ լեփ-լեցուն են, որոշները զբաղված են՝ 70, որոշներն էլ՝ 20 տոկոսով։

«Ջերմուկն այս պահին ակտիվ շարժի մեջ է։ Եթե մարդիկ վախենում են գալ ու այստեղ հանգստանալ, ի՞նչ կարող եմ ասել։ Այս պահին միայն կարող եմ ասել, որ անվտանգ է, մեկ անգամ էլ եմ ասել իմ հարցազրույցում, որ հաշվի առնելով ժամանակները՝ Երևանի կենտրոնում էլ անվտանգ չէ։

Իհարկե, մեր ցանկությունն է, որ Ջերմուկում լինի զբոսաշրջային այն պիկը, որը կար մինչև 2022 թվականի ագրեսիան»,- հավելեց մեր զրուցակիցը։

Փոխհամայնքապետը նաև պարզաբանեց, թե ինչու չի աշխատում ճոպանուղին.

«Ճոպանի խնդիր կա, դրա գնման համար գումարը հատկացվել է Կառավարության կողմից։ Ճոպանը պետք է գնենք արտերկրից, հիմա գնման գործընթացում ենք, գնումների ընթացակարգը մեզ մոտ և արտերկրում տարբեր է, մեր և նրանց օրենսդրությունները տարբեր են։ Հունվար-փետրվարի ձմեռային համահայկական խաղերին ընդառաջ ճոպանուղին պատրաստ կլինի»,- եզրափակեց Վարդան Սարգսյանը։

Ի դեպ, այս տարվա սկզբին Ադրբեջանի նախագահը կրկին իր նկրտումներն էր հայտնել հայկական տարածքների, այս դեպքում՝ Ջերմուկի վերաբերյալ։

Ադրբեջանական հեռուստաընկերություններին տված հարցազրույցում նա ասել էր, թե իբր «Ջերմուկ քաղաքն Ադրբեջանինն է եղել»։

«Մեզ մեղադրում են Հայաստանի վրա հարձակվելու մտադրության համար. ես այս մասին արդեն խոսել եմ, բայց ևս մեկ անգամ ուզում եմ միանգամայն անկեղծ ասել, որ եթե ցանկանայինք, կմտնեինք ու կգնայինք մինչև վերջ։

Մեր դիմաց Ջերմուկ քաղաքն էր՝ մեր նախկին քաղաքը, որի իսկական անունը Իստիսու է։ Ո՞վ կկանգնեցներ մեզ։ Մենք նման մտադրություն չունեինք։ Մեր նպատակը մեր սահմանները պաշտպանելն էր։ Այնպիսի բարձունքներ պետք է ունենայինք մեր ձեռքում, որ մեր աչքերով տեսնեինք, թե ինչ են ծրագրում հայերը»,- իր իրական նպատակները Հայաստանի նկատմամբ չթաքցնելով՝ ասել էր Ալիևը։

Դեռ այն ժամանակ Ջերմուկի փոխհամայնքապետ Վարդան Սարգսյանը 168.am-ին տված հարցազրույցում մեկնաբանել էր Ադրբեջանի նախագահի հնչեցրած խոսքը.

«Նման երկրի նման նախագահն իր քարոզչությունն է իրականացնում, մենք մեր կյանքով ապրում ենք ու մենք մեր տարածքում ենք ապրում։ Այդ տարածքի մի մասն Ադրբեջանի կողմից զավթված է, և հույս ունենք, որ, վաղ թե ուշ, մենք մեր տարածքը կվերադարձնենք, թե ինչ ճանապարհով, սա արդեն ես չեմ որոշում։ Ալիևի ամեն ասածին ուշադրություն չենք դարձնում, մեր հողում, մեր կյանքով ապրում ենք՝ մեր հող ու ջրին կպած»։

Այսօր էլ ջերմուկցին ապրում է իր հող ու ջրին կպած՝ սպասումով, որ վաղ թե ուշ Ադրբեջանի զավթած տարածքը վերադարձվելու է: