Այո, քեզ կարող են վիրավորել, կարող են ցնցել, բայց պաշտոնը փաթեթ է, ունի և դրական, և բացասական կողմ, պաշտոնյան պետք է զսպված լինի․ փաստաբան

Երբ իշխանություններին, թեկուզ, կոշտ քննադատում ես, այդտեղ խնդիրը քաղաքական հայացքները չեն, խնդիրը՝ քաղաքացի-իշխանություն հարաբերություններն են, հատկապես, երբ քաղաքական որևէ ուժի ներկայացուցիչ չես։ Այս մասին լրագրողների հետ զրույցում ասաց Սամվել Վարդանյանի փաստաբան Ռուբեն Մելիքյանը։

Հիշեցնենք, որ Սամվել Վարդանյանի և Հակոբ Ասլանյանի մասնակցությամբ միջադեպը հանրային տրանսպորտում տեղի է ունեցել 2024թ․ ապրիլի 15-ն։ Սամվել Վարդանյանը մեղադրվում է ՀՀ Քրեական օրենսգրքի 297-րդ հոդվածի 1-ին մասի ՝ խուլիգանության և ՔՕ 329-րդ հոդվածի 2-րդ մասի՝ անձի նկատմամբ քաղաքական հայացքներով պայմանավորված հրապարակայնորեն ատելության խոսք արտահայտելու հատկանիշներով։

Ռուբեն Մելիքյանը նշեց՝ Սամվել Վարդանյանը սովորական քաղաքացի է, իր արտահայտությունը, վերաբերմունքն է հայտնել իշխանությանը, ոչ թե՝ քաղաքականությանը։ Մելիքյանի խոսքով՝ այդ հոդվածն իշխանությունն օգտագործում է՝ իրեն կոշտ քննադատողների դեմ։

«Կոշտ քննադատողներ եղել են նաև «նախկինների» օրոք, բայց ով էր այդ մարդկանց դատում»,- նշեց փաստաբանը։
Հարցին՝ «հակահայ վիժվածք» և «ժեխ բիձա» արտահայտությունները վիրավորական արտահայտություններ չեն՞, Մելիքյանը պատասխանեց՝ նշելով, որ որևէ մեկը չի ժխտում, որ դրանք վիրավորական արտահայտություններ են, սակայն վիրավորական արտահայտություն անելն ինքնին հանցակազմ չեն, դրա համար լրացուցիչ էլեմենտներ են պետք։ Մելիքյանը նաև հիշեցրեց ՄԻԵԴ դիրքորոշումը, որ պաշտոնյաները պետք է ավելի զսպված լինեն․ «Այո, քեզ կարող են վիրավորել, կարող են ցնցել, բայց պաշտոնը փաթեթ է, ունի և դրական, և բացասական կողմ»։