Գնել Սանոսյանը՝ Տավուշի 4 գյուղեր հանձնելու եւ Փաշինյանի սպառնալից հայտարարության մասին (video)
Տավուշի հատվածում էլ ունենք հողեր, որ, ըստ այդ քարտեզների, ենթադրվում է, որ պետք է վերադարձվեն մեզ. ԱԺ-ում լրագրողների հետ ճեպազրույցի ժամանակ հայտարարեց Տարածքային ենթակառուցվածքների նախարար Գնել Սանոսյանը՝ պատասխանելով այն հարցին, թե ինչու են սահմանագծումը, սահմանազատումը սկսել իրականացնել հենց Տավուշից և ոչ թե, օրինակ՝ Ջերմուկից, որտեղ ՀՀ-ի տարածքները օկուպացված են։
Նախարարը նշեց, որ 4 գյուղերի վերադարձման հետ կապված որոշումներ դեռ չկան։ «Խոսքը երկու երկրների համապատասխան հանձնաժողովների աշխատանքի մասին է, որը միտված է, որ երկու երկրների միջև տեղի ունենա սահմանազատման, սահմանագծման պրոցես։ Դինամիկա կա, հանդիպումներ են լինում, կողմերը վերադառնում են իրենց մոտ, պրոցես է, չգիտեմ՝ երբ է հաջորդ հանդիպումը»,-ասաց նախարարը և նշեց, որ հիմա գտնվում են իրավական, փաստաթղթային պրոցեսում, հետո տեղում բուն սահմանազտման պրոցեսը կլինի։
Ըստ Սանոսյանի՝ տեղի բնակչության անորոշության պատճառն այն է, որ «որոշ մարդիկ փորձում են անորոշ, անհասկանալի լուրեր տարածել»։
«Վարչապետի միտքը եղել է շատ պարզ, որ հաջորդ հանդիպմանը նույնիսկ կարող է ինքը գալ, եթե կա այնպիսի նորություն կամ փոփոխություն, որ կարող է ինքն արտահայտել։ Քանի որ որոշում չկա, փոփոխություն չկա, ամեն օր հանդիպման կարիք միգուցե չկա։ Բայց գրեթե ամենօրյա ռեժիմով կա՛մ Ոսկեպարում, կա՛մ մարզպետարանում կան հանդիպումներ, պարզաբանումներ»,-ասաց նա։