Արդարադատության միջազգային դատարանից որեւէ արձագանք ակնկալել պետք չէ․ փաստաբան
![Արդարադատության միջազգային դատարանից որեւէ արձագանք ակնկալել պետք չէ․ փաստաբան](/timthumb.php?src=/disc/24-03-23/7ac417dadbbcaf04e3b31f939616796e.jpg&w=708)
Արդարադատության միջազգային դատարանը դեռ չի ակտիվացրել սեփական որոշումների կատարման մոնիտորինգի մեխանիզմները։ Այս մասին մարտի 24-ին ԱԺ արտաքին հարաբերությունների մշտական խորհրդարանական հանձնաժողովի արտահերթ նիստում հայտարարեց միջազգային իրավական հարցերով Հայաստանի ներկայացուցիչ Եղիշե Կիրակոսյանը՝ պատասխանելով պատգամավորների հարցերին։
Նրա խոսքով, ուղղակի իմաստ չունի դիմել դատարան՝ Ադրբեջանի դեմ նոր միջանկյալ միջոցներ կիրառելու պահանջով։
«Ի վերջո, Արդարադատության միջազգային դատարանի որոշումը միանգամայն պարզ էր՝ անհապաղ ապահովել Լաչինի միջանցքի անխափան երթեւեկությունը։ Տեսականորեն, Դատարանը, իհարկե, կարող է հավաքել մի երկու երեք դատավորի, ովքեր նպատակաուղղված կվերահսկեն նախկինում ընդունված որոշումների կատարումը։ Սակայն Դատարանի աշխատանքը կարգավորող իրավական դաշտում հստակ դրույթներ չկան, թե երբ կարող է կամ պետք է կիրառվի այս միջոցը», - ասաց Կիրակոսյանը։
Այս հարցը, ինչպես նշեց փաստաբանը, ամբողջությամբ թողնված է Դատարանի հայեցողությանը։
«Իհարկե, եղել են դեպքեր, երբ դատարանը նման նախաձեռնություն է ցուցաբերել, բայց մեր դեպքում դա դեռեւս չենք տեսնում», - շեշտեց միջազգային իրավական հարցերով Հայաստանի ներկայացուցիչը։