Շրջափակված Արցախում ամբողջական շրջափակման պայմաններում ծնվել է 338 երեխա
Շրջափակված Արցախում ամբողջական շրջափակման պայմաններում ծնվել է 338 երեխա։ Այս մասին ֆեյսբուքյան իր էջում գրել է ՀՅԴ անդամ, ԱԺ «Հայաստան» խմբակցության պատգամավոր Քրիստինե Վարդանյանը:
«Նրանցից 2-ը «Սերունդ» հիմնադրամի շահառուներ են, քանի որ ծնվել են Արցախի Եղցահող, Չարեքտար և Հին շեն համայնքներից մեկում, որտեղ հիմնադրամը բոլոր նոր ծնված երեխաների ընտանիքներին ամսական տրամադրում է 50000 դրամ՝ 16 տարի 8 ամիս շարունակ:
Հիմնադրամը նպատակ ունի նպաստել հայ ժողովրդի արդի ամենամեծ խնդիրներից մեկի՝ ժողովրդագրական խնդրի լուծմանը՝ խրախուսելով ծնելիության աճը։ Ծրագրի հեղինակները որոշել են ծրագիրը մեկնարկել Արցախի համեմատաբար փոքր համայնքներից։
Այս ծրագրին կարելի է աջակցել ամսական սկզբունքով հիմնադրամին նվիրատվություն կատարելու միջոցով։ Նվիրատվությունը կարող է լինել ցանկացած չափի։ Ծրագրին միանալու համար պարզապես անցեք հղումով:
Այս ընթացքում Արցախում ծնված բոլոր փոքրիկները կարող էին լինել այս ծրագրի շահառուները, եթե հիմնադրամի գործունեության մասին տեղեկատվությունը բոլորին հասանելի լիներ, իսկ նվիրատուների թիվը շատ ավելի մեծ լիներ։ Ուստի այստեղ շատ աշխատանք կա անելու։ Դրա համար էլ խնդրում եմ Հայաստանում և Սփյուռքում բնակվող իմ բոլոր ընկերներին հնարավորության դեպքում որպես նվիրատու միանալ հիմնադրամին։
Ճանաչելով գաղափարի հեղինակներին և հիմնադրամը ստեղծողներին՝ կարող եմ վստահեցնել, որ հիմնադրամին նվիրաբերված յուրաքանչյուր դրամ բազմապետկվելու և օգտագործվելու է Արցախում և Հայաստանում ծնելիության խթանման համար։
Հ․ Նկարում Արցախի Եղծահողի նոր բնակիչ Աշոտն է, ով «Սերունդ»-ի 2-րդ շահառուն է (նկարը հրապարակված է ծնողների համաձայնությամբ)»,- գրել է նա։
Հետևեք մեզ Telegram-ում