ԲԴԽ-ն որոշեց նկատողություն հայտարարել Արթուր Ստեփանյանին

Երևանի ընդհանուր իրավասության դատարանի դատավոր, Դատավորների միության փոխնախագահ Արթուր Ստեփանյանի նկատմամբ հայտարարվեց նկատողություն։

«Փաստինֆո»-ի թղթակցի հաղորդմամբ՝ ԲԴԽ-ն՝ նախագահությամբ Ստեփան Միքայելյանի, բավարարեց Արթուր Ստեփանյանին կարգապահական պատասխանատվության ենթարկելու վերաբերյալ ՀՀ արդարադատության նախարարության միջնորդությունը։
Հիշեցնենք, որ Երևանի ընդհանուր իրավասության դատարանի դատավոր Արթուր Ստեփանյանի նկատմամբ վարույթը հարուցվել է ՀՀ արդարադատության նախարարության կողմից։ Դատավորին վերագրվում է դատավարական ժամկետի խախտում, որը, ըստ վարույթ հարուցող մարմնի, հանգեցրել է ինչպես դատավարական իրավունքի նորմի, այնպես էլ՝ դատավորի վարքագծի կանոնի խախտման։ Մասնավորապես, ըստ ներկայացված միջնորդության, դատական ակտն ուշացումով է կողմին տրամադրվել։
Մասնավորապես, կարգապահական վարույթի քննարկման շրջանակներում ՀՀ արդարադատության նախարարության Վերահսկողական վարչության պետ Հայկ Սանոյանը հրապարակել է միջնորդության հիմնավորումները, համաձայն որոնց՝ եզրափակիչ դատական ակտը հրապարակել է սահմանված ժամկետից առնվազն մեկ տարի յոթ ամիս անց, եզրափակիչ դատական ակտի օրինակը՝ հայցվորին տրամադրվել է սահմանված ժամկետից 1 տարի 4 ամիս անց, իսկ պատասխանող կողմից 1 տարի 7 ամիս անց տրամադրված չէ։ Ըստ նախարարության՝ դատավորը չի գիտակցել իր վարքագծի ոչ իրավաչափ բնույթը, թեև ակնհայտորեն պարտավոր էր դա անել, հետևաբար, դատավարական իրավունքի նորմերի և վարքագծի կանոնների խախտումը թույլ է տրվել կոպիտ անփութությամբ։
Դատավոր Արթուր Ստեփանյանի ներկայացուցիչ Սիրանուշ Սահակյանն էլ բարձրաձայնել էր՝ վարույթը կարճելու անհրաժեշտության մասին։ Նշենք, որ կարգապահական վարույթը հարուցվել էր անձի հաղորդման հիման վրա, որը հետագայում հետ է վերցրել դիմումը, իսկ ՀՀ ԱՆ-ն իր կողմից մատնանշել է նաև պատասխանող կողմին որոշում չտրամադրելու հանգամանքը, ինչն առարկայազուրկ է։ Ընդ որում, պատասխանող կողմը հերքում է ՀՀ ԱՆ պնդումները, մասնավորապես, պատասխանողը վերաքննիչ բողոք է ներկայացրել, ինչը ենթադրում է, որ դատական ակտը պատասխանողը ստացել է։ Բացի այդ, Սահակյանի կողմից բարձրաձայնվել էր նաև «Երանուհի Թումանյանց-Գրիգոր Մինասյան-Կարեն Անդրեասյան» եռամիասնության հարցը՝ արձանագրելով, որ Երանուհի Թումանյանցը, որը նախկինում զբաղեցրել էր ԱՆ փոխնախարարի պաշտոնը, ունի սերտաճվածություն՝ Անդրեասյանի հետ, ուստի, չի կարող լինել անկողմնակալ։
Սիրանուշ Սահակյանը հավելեց նաև, որ արդարադատության նախարար եղած ժամանակ Կարեն Անդրեասյանը նույնաբնույթ խախտումների ժամանակ ցուցաբերել է խտրական վերաբերմունք՝ այս դեպքում հարուցելով, իսկ բազմաթիվ այլ դեպքերում այլ դատավորների նկատմամբ կարգապահական վարույթ հարուցելու միջնորդություն չներկայացնելով: Արթուր Ստեփանյանը միացավ իր ներկայացուցչի դիրքորոշումներին:

«Երանուհի Թումանյանցին չեմ ճանաչում, շփվել ենք նրա՝ ԲԴԽ գալուց հետո, ունեմ դրական վերաբերմունք, բայց նա չի կարող լինել անկողմնակալ»,- ասաց Արթուր Ստեփանյանը:

Սահակյանի դիտարկմամբ՝ տպավորություն է, թե քննարկման առարկա էր դարձվում դատական դեպարտամենտի տեխնիկական աշխատանք կատարող աշխատակցի պատասխանատվության հարցը, որը պարտավոր էր դատավորի կողմից որոշման տրամադրման արդյունքում մի կողմից ապահովել դրա հրապարակումը կայքում, մյուս կողմից՝ առձեռն գրությամբ հանձներ հայցվորին, պատասխանողին, կամ՝ հանձներ փոստին, մինչդեռ, այս դեպքում գործ ունենք դատավորի հետ և կարգապահական զանցանքի մեղադրանքում ի սպառ բացակայում է դատավորին վերագրվող արարքի օբյեկտիվ կողմը։ Սահակյանն ուշադրություն դարձրեց այն հանգամանքին, որ դիմումատուն թյուրիմացության համար հետ է վերցրել բողոքը՝ չցանկանալով հետամուտ լինել դրա քննարկմանը և ինքնին «թյուրիմացություն» բառը վկայում է, որ դիմող կողմը միտումներ չի տեսնում դատավորի գործողություններում։
ԲԴԽ-ն խորհրդակցական սենյակում որոշում կայացրեց՝ դատավոր Արթուր Ստեփանյանին կարգապահական պատասխանատվության ենթարկելու վերաբերյալ միջնորդությունը բավարարելու մասին։