Դիվանագիտական լուրջ քայլեր են պետք. Արցախի ՄԻՊ
ՀՀ դիվանագիտությունը անդադար պետք է աշխատի, որպեսզի Արցախում տիրող իրավիճակի մասի օպերատիվ տեղեկացվեն միջազգային կազմակերպությունները, տարբեր երկրներ։ Ցավոք, գործ ունենք մի աշխարհի հետ, որտեղ մարդու իրավունքներն ու, առհասարակ, մարդասիրությունը երկրորդական պլան են մղվել, և երկրներն առաջնորդվում են միմիայն իրենց քաղաքական շահերով։ Առավելապես անհրաժեշտ է աշխատել մեր իրավունքներն այլ երկրների շահերի հետ համադրելու ուղղությամբ։ Այդ մասին «Փաստինֆո»-ի հետ զրույցում ասաց Արցախի Մարդու իրավունքների պաշտպան Գեղամ Ստեփանյանը։
«Միջազգային կազմակերպություններում, տարբեր երկրներում Հայաստանի դիվանագիտական ներկայացուցիչները, առաջին հերթին, ամենօրյա ռեժիմով Արցախում տիրող օբյեկտիվ իրավիճակը պետք է հասանելի դարձնեն օտարերկրյա ներկայացուցիչներին և հետևողական լինել, որ համարժեք արձագանքը չուշանա։ Դիվանագիտական լուրջ քայլեր են պետք, որ այդ ամեն ինչը տեղ հասնի․ ոչ թե ուղղակի ծանոթանան այդ նյութերին ու ծալեն, դնեն մի կողմ, այլ՝ դրան հաջորդեն կոնկրետ գործողություններ՝ հասցեական հայտարարություններից մինչև Ադրբեջանի նկատմամբ պատժամիջոցների կիրառում»,-ասում է Արցախի Մարդու իրավունքների պաշտպանը։
ՄԻՊ-ի խողովակով, ինչպես նշեց Ստեփանյանը, դրա համար հնարավոր ամեն ինչ արվում է․ հայտարարություններից մինչև փաստահավաքի արդյունքում արձանագրված դեպքերն ուղարկվում են թե ԵԱՀԿ Մինսկի խմբի համանախագահությանը, թե՝ ՄԱԿ-ում ՀՀ ներկայացուցիչների միջոցով՝ այլ կառույցների։
Գեղամի Ստեփանյանի խոսքով՝ օպերատիվ կապն Արցախի ու Հայաստանի ՄԻՊ գրասենյակների և ԱԳՆ մակարդակով պահվում է, մեդիադաշտն էլ օպերատիվ և ակտիվ լուսաբանում է Արցախում կատարվողը։ Հետևապես, նրա արձանագրմամբ՝ Արցախում տիրող օբյեկտիվ իրականության մասին միջազգային հանրությանը իրազեկելու հարցում խոչընդոտներ չկան, միայն թե ավելի եռանդուն է պետք աշխատել, որպեսզի գնահատականերն ու քայլերը լինեն հասցեական։
Հիշեցնենք, որ օգոստոսի 1-ից Ադրբեջանը կրկին դիմել է Արցախի նկատմամբ ռազմական ագրեսիայի՝ կիրառելով ականանետեր, ԱԹՍ-ներ։ Արցախի ՊԲ-ի համարժեք քայլերի արդյունքում շփման գծի փոփոխություն տեղի չի ունեցել։
Ադրբեջանական ագրեսայի հետեւանքով հայկական կողմն ունի երկու զոհ, 19 վիրավոր, որոնցից 4-ի վիճակը գնահատվում է ծանր, նրանցից մեկինը' ծայրահեղ ծանր: Մյուս վիրավորների վիճակը բավարար է:
Ռուսական զորակազմի հրամանատարության միջնորդությամբ շարունակում են քայլեր ձեռնարկվել իրավիճակի կայունացման ուղղությամբ:
Հետևեք մեզ Viber-ում
