ՌԴ ԱԳՆ- ն անհանգստություն է հայտնել՝ Լեռնային Ղարաբաղում ստեղծված իրավիճակի կապակցությամբ

ՌԴ ԱԳՆ-ն ծայրահեղ անհանգստություն է հայտնում Լաչինի միջանցքի և շփման գծի այլ հատվածներում լարվածության աճի կապակցությամբ։

«Ցավոք, կան զոհեր. Խորին ցավակցություն ենք հայտնում զոհվածների ընտանիքներին և մերձավորներին, իսկ վիրավորներին՝ շուտափույթ ապաքինում»,- ասվում է Լեռնային Ղարաբաղի հակամարտության գոտում իրավիճակի սրման կապակցությամբ ՌԴ ԱԳՆ կայքում հրապարակված հայտարարության մեջ։

Նշվում է, որ ռուս խաղաղապահները գործադրում են բոլոր ջանքերը «տեղում» իրավիճակը կայունացնելու համար։

«Երկու կողմերի հետ ակտիվ աշխատանք է տարվում բոլոր ուղիներով և բոլոր մակարդակներով, ներառյալ երկրի բարձրագույն ղեկավարության», - ասվում է հայտարարության մեջ՝ արձանագրելով, որ Ռուսաստանի Դաշնության արտաքին գործերի նախարար Սերգեյ Լավրովը սերտ կապի մեջ է Ադրբեջանի և Հայաստանի իր գործընկերների հետ ։

ՌԴ ԱԳՆ-ն կոչ է անում կողմերին զսպվածություն ցուցաբերել և պահպանել հրադադարի ռեժիմը։

«Մենք ելնում ենք նրանից, որ առկա հակասությունների կարգավորումը պետք է իրականացվի բացառապես քաղաքական և դիվանագիտական ճանապարհով՝ հաշվի առնելով կողմերի դիրքորոշումները և Ռուսաստանի, Ադրբեջանի և Հայաստանի ղեկավարների 2020 թ. նոյեմբերի 9-ի հայտարարության դրույթների խստորեն պահպանումը։ Մենք համոզված ենք, որ կողմերի ջանքերը պետք է կենտրոնացվեն Բաքվի և Երևանի միջև հարաբերություններում առկա եռակողմ բանակցային ձևաչափերի շրջանակներում դրական օրակարգ ձևավորելու վրա»,- ասված է հայտարարության մեջ։