7 ամիս անհետ կորած պայմանագրային զինծառայողի կինը 3 մանկահասակ երեխաների հետ կարող է դրսում հայտնվել. news.am

Արդեն յոթ ամիս անհետ կորած պայմանագրային զինծառայող Վահե Մանուկյանից մինչ այժմ որեւէ տեղեկություն չկա: Մանուկյանի կինը՝ Լիանա Մելիքսեթյանը, NEWS.am-ի հետ զրույցում պատմեց, որ ամուսնու կորելու հավանական վայր համարվող ծառայությանը մոտ գտնվող ձորում են փնտրել, սակայն ոչինչ չեն հայտնաբերել:

«Ասում էին, որ ձյունը հալվի այդ ձորում կփնտրեն, հնարավոր է ձորն է գլորվել, բայց իմացել եմ, որ ձորում որոնողական աշխատանքներ են իրականացրել եւ ոչինչ չեն գտել: Պաշտպանության նախարարություն եմ բազմիցս դիմել, ինձ պատասխանել են, որ ամուսինս համարվում է դասալիք, ոչ մի բանով չեն կարող ինձ օգնել: Ո՛չ ամուսնուս աշխատավարձն են տալիս, ո՛չ էլ անհետ կորածի կարգավիճակ են տալիս»,- ասաց նա:

Լիանան նշեց, որ օրերս դիմել է Քննչական կոմիտեի ղեկավար Արգիշտի Քյարամյանին, որպեսզի ամուսնուն անհետ կորածի կարգավիճակ տրվի:

«Իրենք ասում են, որ ձորն է գլորվել, որպեսզի երեւի լրագրողների ուշադրությունը շեղեն, բայց այդ տարբերակն էլ փաստորեն հերքվեց, իմ ամուսինը 3 տարի ծառայել է այդ վայրում, լավատեղյակ էր տեղանքին, հնարավոր չեմ համարում այդ տարբերակը»,- ասաց նա:

Լիանան դիմել է նաեւ ՀՀ գլխավոր դատախազ Արթուր Դավթյանին, սակայն մինչ այժմ որեւէ պատասխան չի ստացել:

Երեք մանկահասակ տղաների հետ ապրող եւ չորրորդին սպասող Լիանան վարձով է ապրում Եղեգնաձորում, երեխաներին խնամում է 34 500 դրամ նպաստով:

«Ահավոր վիճակում եմ, մի քանի ամիս վարձը չեմ վճարել, համ էլ վարձը 40 հազարից թանկացրել, դարձրել են 50 հազար դրամ, երեւի ամսվա վերջ տունը կլքեմ: Խնդրել եմ, որ գյուղում ինձ տարածք տրամադրեն, տնակ տեղադրեմ, ապրեմ, բայց ասում են` տարածք չկա հարմար, չգտեմ ինչ անեմ»,- ասաց նա:

33-ամյա Վահե Մանուկյանը ծառայում էր Վայոց Ձորի մարզում։ Նա անհետ կորել է 2021թ. նոյեմբերի 12-ին, երբ վերջին հերթափոխն էր իրականացնում, քանի որ ավարտվում էր պայմանագրի ժամկետը։

Պայմանագրային զինծառայողի անհետանալու փաստով Վայքի ռազմական ոստիկանությունում 2021թ. նոյեմբերի 22-ին քրեական գործ է հարուցվել Քրեական օրենսգրքի 361-րդ հոդվածի առաջին մասով նախատեսված հանցագործության հատկանիշներով (զորամասը կամ ծառայության վայրն ինքնակամ թողնելը)։

Գործը նախաքննության փուլում է, ինչը նշանակում է, որ Վահե Մանուկյանի անհետացման վերաբերյալ ձեռք բերված տվյալները հրապարակման ենթակա չեն։