«Ոստիկաններն ասում էին՝ հերիքա, էսքան մի բերեք, քաղմասերում տեղ չկար». Շահե Աճեմյանն այսօր բերման է ենթարկվել

Այսօր ոստիկանների կողմից բերման ենթարկված անձինք ստիպված են եղել շրջել ոստիկանական ավտոբուսով՝ ոստիկանության բաժիններով մինչեւ իրենց կընդունեն։

«Այնքան մարդ էին բերել ոստիկանության բաժին, որ էլ տեղ ու դադար չկար։ Մեզ 1.5 ժամ ավտոբուսով ամբողջ քաղաքով մեկ պտտացրին, ոչ մի բաժանմունք չէր ընդունում։ Արդեն ոստիկաններն էին ասում՝ հերիքա, էսքան մի բերեք, քաղմասներում էլ տեղ չկա»,- «Փաստինֆո»-ի հետ զրույցում պատմում է Արցախյան երեք պատերազմների մասնակից, ազատամարտիկ Շահե Աճեմյանը, ում այսօր առավոտյան ոստիկանական ուժերը, բիրտ ուժի կիրառմամբ, տեղափոխել էին ոստիկանական բաժանմունք։

Վերջինս մանրամասնում է՝ բռնի ուժի կիրառման բազմաթիվ դեպքերն այսօր իր աչքով է տեսել. «Մենք մեզ համար հանգիստ քայլում էինք, պարոն Աշոտյանի հետ միասին ուզում էինք ծաղկեպսակ դնեինք Մոսկովյան փողոցում, մեկ էլ նկատեցինք, որ մեր հետևից ոստիկանական ուժերը, առանց որևէ զգուշացման, եկան ու սկսեցին վայրենի ձևով՝ մարդկանց գրկելով տանել դեպի ավտոբուսներ։ Ոչ մի բան չէին էլ զգուշացնում, ուղղակի մոտենում էին ու, առևանգելով, տանում մարդկանց։ Նույնիսկ, մի պատահական մարդու էլ բռնեցին, սա ասում է՝ ախպոր պես, ես գործի եմ գնում, երթի մասնակից չեմ, բայց հաշվի չառան, տարան»,- ասել է Շահե Աճեմյանը։

Ազատամարտիկը, սակայն, նույնիսկ բիրտ ուժի կիրառմամբ բերման ենթարկվելուց հետո, ոստիկանական բաժանմունքից վերադարձել է Ֆրանսիայի հրապարակ՝ հայտարարելով է՝ ոչ մի ուժ, ոչինչ, չի կարող կոտրել այն ոգին, որն իրեն բերել է այստեղ՝ հրապարակ՝ պայքարի, մինչև բոլորով միասին չհասնեն վերջնական արդյունքի, որը, ըստ վերջինիս՝ ազգադավ իշխանությունների հեռացումն է։