Երեկ Ալիևը սպառնացել է, եթե Հայաստանը «չբացի «Զանգեզուրի միջանցքը», ապա Ադրբեջանը ռազմական ճանապարհով կբացի այն

Նոյեմբերի 6-ին Իլհամ Ալիևը ադրբեջանական համայնքներից մեկում ելույթի ժամանակ ասել է հետևյալը. «Ես ասում եմ, որ մեզ ասեն, թե երբ է բացվելու «Զանգեզուրի միջանցքը», և այս դեպքում որևէ խնդիր չի լինի: Քանի դեռ ուշ չէ, նրանք [Հայաստանը-Zham.am] պետք է ընդունեն մեր պայմանները և վերջ դնեն ճանապարհների և հաղորդակցությունների նկատմամբ ոչ անկեղծ մոտեցմանը»։

Իլհամ Ալիևը «Զանգեզուրի միջանցքի» հարցը համեմատել է ղարաբաղյան երկրորդ պատերազմին նախորդած իրավիճակի հետ, երբ, ըստ իր կարծիքի, հայկական զորքերը պետք է լքեին 7 շրջան, եւ պետք էր հստակ նշվեր զորքերի դուրսբերման ժամկետները։

Նոյեմբերի 6-ին Ալիևը կրկնեց այս միտքը՝ նշելով, որ ակնկալում է, որ «Հայաստանի իշխանությունները կոնկրետ ժամկետներ կնշեն ու կբացեն Զանգեզուրի միջանցքը»։

Երեկ Ալիևը նույնպես փաստացի ակնարկեց, որ այս հարցը գործնականում բանավոր համաձայնեցված է, Փաշինյանը պարզապես վախենում է ընդունել այս փաստը հայ հասարակության առաջ։ Ավելին, ըստ ադրբեջանցի քաղաքական մեկնաբանների, Ալիևը կոշտացրել է իր դիրքորոշումը՝ հիմք ընդունելով այն փաստը, որ հայ-ռուսական հարաբերություններում հերթական ճգնաժամն է, իսկ թուրք դիտորդների կարծիքով՝ Փաշինյանը նվեր է «թուրքական աշխարհի» համար։

Թուրք վերլուծաբանները նշում են, որ երկրորդ կարևոր խնդիրը ռազմական ճանապարհով լուծելու համար անհրաժեշտ է հետևողականորեն և համբերատար սպասել հայ-ռուսական հարաբերություններում նոր ճգնաժամի ի հայտ գալուն։ Այն, որ Փաշինյանը նվեր է Ադրբեջանին ու Թուրքիային, բոլորին էլ պարզ է, իսկ թե ինչու են պարբերաբար ծագում ռուս-հայկական ճգնաժամեր՝ առանձին զրույցի թեմա է։

Այսօր արդեն կարելի է կռահել, որ Նիկոլ Փաշինյանը պատրաստում է իր «պահեստային ելույքը», որտեղ արդարանալու է, թե «ինչու չհաջողվեց Սյունիքը պաշտպանել Ալիևից և Թուրքիայից»։

Նիկոլ Փաշինյանն իսկապես նվեր է Թուրքիայի և Ադրբեջանի համար, իսկ հայ ժողովրդի համար ողբերգությունների պատճառ, քանի որ վերջին 100 տարիների ընթացքում Փաշինյանն առաջին քաղաքական գործիչն է, ով հայությունը կանգնեցրել է է նման հսկայական ճգնաժամի դիմաց։

Այլ հարց է, որ հայ հասարակությունը և հայկական քաղաքական վերնախավը պետք է ամաչեն, որ նման օրհասական պահին չեն կարող հանդես գալ միասնական, համախմբված քաղաքական այլընտրանքով, որը վերջ կդնի Փաշիյանի իշխանությանը և հայ ժողովրդի տեւական ճգնաժամին։

Սա՛ է իրականությունը:

Դավիթ Մկրտչյան

zham.am