Քանի դեռ կան սերգեյները, «գունագեղ» տոնակատարություններ միշտ էլ կլինեն. Մութաֆյան

«Քիչ առաջ Հանրապետության հրապարակում էի ու, ճիշտն ասած, բացարձակապես չեմ հասկանում, թե ինչու է մեր հասարակությունը բարկացած Փաշինյան Նիկոլի վրա։ Քանի որ չի կարելի բարկանալ թուրքի վրա, այն պարզ պատճառով, որ նա հայատյաց է։ Հրապարակում բեմի վրա փորձ էր ընթանում, մի պահ ականջիս ծանոթ երաժշտություն հասավ։ Շրջվեցի դեպի բեմն ու տեսա, որ բեմի վրա Արամ Խաչատրյանի անվան սիմֆոնիկ նվագախումբն է փորձում ու հենց այն երաժշտությունը, որը նվագել էին 2016 թվականին` Հայաստանի անկախության 25 ամյակին, «Անկախության սերունդ»նվագախմբի կազմով։ Ցավոք սրտի, նրանց մեծ մասին ճանաչում եմ, նաեւ ճանաչում եմ նվագախմբի ղեկավար Սերգեյ Սմբատյանին, շատ ենք աշխատել միասին։

Հիշում եմ, 2018 թվականին, իշխանազավթումից հետո նվագախմբի ղեկավար Սերգեյը եւ տնօրեն Աննան առիթ բաց չէին թողնում՝ քննադատելու Նիկոլին։ Դե գոնե միայն այն պարզ պատճառով, որ Հայաստանի նման փոքր երկրում երկրորդ սիմֆոնիկ նվագախումբ, այն էլ այս տեսակ ցածր մակարդակով պետք չէր ու այն ստեղծվեց միայն ու միայն Սերգեյի հոր` Արմեն Սմբատյանի ու Սերժ Սարգսյանի մտերմության շնորհիվ։ Բայց այդ քննադատությունները երկար չձգվեցին, քանի որ Սերգեյի հոր վրա գործեր հարուցվեցին, ինչպես նաեւ կրճատվեց նվագախմբին հատկացվող պետական գումարը եւ Նիկոլը հեշտությամբ դարձավ նրանց բոլորի սրտի վարչապետը։

Այսօր արդեն Սերգեյը եւ իր վաճառված դաստեն այս ամոթալի պայմաններում պատրաստվում են հողատու ու արնավաճառ իշխանության պատվերով նվագել։ Այս տեսակ մարդկանց վրա է պետք բարկանալ ու մերժել, որովհետեւ թուրքը մնում է թուրք, իսկ վաճառվող հայը ամենանողկալի ու վտանգավորն է պետության համար։ Քանի դեռ կան սերգեյները գունագեղ տոնակատարություններ միշտ էլ կլինեն», - գրել է «Խեղափոխություն» նախաձեռնության հեղինակ ՆԱՐԵԿ ՄՈՒԹԱՖՅԱՆԸ։