Վստահ չեմ, որ ադրբեջանցիները իրանցի վարորդների են ձերբակալել. կճշտենք. Սուրեն Պապիկյան
ԱԺ-ում կառավարության հետ հարցուպատասխանի ընթացքում, ՀՀ փոխվարչապետ Սուրեն Պապիկյանը, անդրադառնալով «Հայաստան» խմբակցության պատգամավոր Հռիփսիմե Ստամբուլյանի այն հարցին, որ, ըստ շրջանառվող տեղեկությունների, Գորիս-Կապան ավտոճանապարհի Որոտանի հատվածում ադրբեջանցի ծառայողներն այսօր իրանցի երկու վարորդի են ձերբակալել՝ սպառնալով, որ նրանց ազատազրկելու են, ասաց, որ այդ վստահությունը ձերբակալվելու մասին ես չունի. «Վստահ չեմ որ դա տեղի է ունեցել, պաշտոնական խողովակներով կճշտենք, եթե կարիք լինի, տեղյակ կպահենք նաեւ Ձեզ»:
Պատգամավորը հետաքրքրվեց նաեւ՝ ի՞նչ է սպասվում Գորիս-Կապան ճանապարհով Իրանից Հայաստանի տարածքով բեռնափոխադրումներ իրականացնելուն եւ որքա՞ն է այս պահին տիրող իրավիճակը տեւելու, չէ՞ որ Հայաստան բեռների շուրջ 40%-ը Իրանից է գալիս, իսկ Տաթեւի այլընտրանքային ճանապարհը շատ նեղ է մեծ բեռնատարների տեղաշարժի համար:
«Ինչ-որ չափով այդ խնդիրը մեղմել հնարավոր է միայն այլընտրանքային ճանապարհի վերակառուցումից հետո:Այն, որ բարդ խնդրի առաջ ենք, փաստ է, բայց, բարեբախտաբար, ունենք Հ-46 ճանապարհը, որի շինարարությունը մեկնարկելիս ընդդիմությունը շատ քննադատեց, բայց դրա կառուցումն ու այժմ շարունակվող աշխատանքները հնարավորություն են տալիս, որ կարողանանք փոքրիշատե իրավիճակը բարելավել: ԱԳՆ-ն մշտական կապի մեջ է Իրանի մեր գործընկերների հետ, փորձում ենք համատեղ ջանքերով իրավիճակը կայունացնել եւ պահել վերահսկողության սահմաններում: Գիտենք թե բեռների քանակի ու ապրանքների մասին»,- նշեց Պապիկյանը:
Արդյո՞ք նույն խնդրի առաջ կարող ենք բախվել Տավուշում՝ Մ-6 միջպետական ճանապարհին, կառավարությունը պատկերացնու՞մ է, թե ինչ տնտեսական աղետի առաջ է երկիրը կանգնելու, եթե այդ հատվածում էլ նման իրավիճակ ստեղծվի: Պատգամավորի հնչեցրած այս հարցադրմանը փոխվարչապետի կողմից պատասխան չհնչեց: