Որքան էլ ֆենոմենալ է, Նիկոլ Փաշինյանի իշխանության հիմնական թիրախները հայերն են, եկեղեցին. Ռուբեն Մելքոնյան
«Քարոզարշավի ընթացքում ոչ միայն ձեւավորվել է երկու հստակ բեւեռ, այլեւ ձեւավորվել են բեւեռներ ասելիքի եւ դրա բացակայության: «Հայաստան» դաշինքը հանդես է գալիս կոնկրետ ծրագրով, տեսլականով, իսկ հեռացող իշխանության ղեկավարը միայն ատելության խոսքով: Նրա ելույթները ցույց են տալիս, որ ասելիք չունի: Հիմա արձանագրվում է, որ նրա քաղաքական եւ հռետորաբանական զինանոցը դատարկ է: Տարբերություն է նկատվում նաեւ պրոֆեսիոնալիզմի եւ դիլետանտիզմի միջեւ»,- լրագրողների հետ հանդիպման ժամանակ նշեց «Հայաստան» դաշինքի ներկայացուցիչ պատմաբան Ռուբեն Մելքոնյանը:
«Հեռացող իշխանությունը, քանի որ ասելիք չունի, կրկնում են նախկին թեզերը՝ համեմելով ատելության խոսքով: Որքան էլ ֆենոմենալ է, Նիկոլ Փաշինյանի իշխանության հիմնական թիրախները հայերն են, Հայաստան պետությունը կերտած անձինք, Հայաստանի քաղաքացիները, ընդդիմադիրները: Նրանց խոսքում հիմա էլ չենք տեսնում մեր հակառակորդների մասին որեւէ արձանագրում: Նրանք բոցավառ ատելությամբ շարունակում են թիրախավորել Հայաստանի համար լուրջ ներդրում ունեցած անձանց:
Հեռացող իշխանության պարագլուխը այսօր թիրախավորել է եկեղեցուն՝ հայտարարելով, որ հոգեւոր էլիտան ծնկի է գալու: Սա եւս մի վկայություն է, որ այս իշխանության կրոնական, պետական ընկալումները այդ իշխանության շրջանում որեւէ տեղ չունեն: Շատ օրինաչափ է, որ ազգային կրթություն տող մեր օջախները այս իշխանության համար թիրախ են»,-ընդգծեց պատմաբանը: