Հայաստանի հիմնական դաշնակիցը Ռուսաստանն է, եւ դա վերանայման ենթակա չէ. Ծառուկյան
«Հայաստանում առաջին հերթին պետք է լուծել անվտանգության խնդիրը, եւ դրա համար անհրաժեշտ է է՛լ ավելի ամրապնդել Ռուսաստանի հետ կապերը: Ղարաբաղում պատերազմը ցույց է տվել, որ Ռուսաստանը միակ պետությունն էր, որն առաջին օրից հնարավոր աջակցությունն է ցուցաբերել Հայաստանին: Ռուսաստանը այսօր էլ սատարում է Հայաստանին, քանի որ այդ երկրի սահմանապահները հայ զինվորականների հետ միասին ապահովում են հանրապետության սահմանների անվտանգությունը, ինչպես դա նախքան պատերազմն էր»,- այդ մասին նախընտրական քարոզարշավի շրջանակում հունիսի 11-ին Եղեգնաձորում հայտարարել է «Բարգավաճ Հայաստան» կուսակցության առաջնորդ Գագիկ Ծառուկյանը:
«Մեր հիմնական դաշնակիցը Ռուսաստանն է, եւ դա վերանայման ենթակա չէ: Մեր հարաբերություններն ունեն բազմադարյա պատմություն: Մենք եղբայրացել ենք, եղել ենք մտերիմ եւ այժմ պատրաստ ենք շարունակել այդ հարաբերությունները»,-ասել է Ծառուկյանը՝ հավելելով, որ ՌԴ-ում նույնպես պատրաստ են շարունակել փոխադարձ ռազմական համագործակցությունը, որն ուղղված է Հայաստանի եւ դրա ժողովրդի անվտանգության ապահովմանը: