Արտաքին գործընկերների հետ համագործակցության միակ ճանապարհը ուղիղ եւ ազնիվ լինելն է. Ռոբերտ Քոչարյան
«Ժամանակակից թվային աշխարհում մտածել, թե կարող ես չինացիներին մի բան ասել, ռուսներին՝ այլ բան, ամերիկացիներին՝ մի երրորդ բան, մեծ սխալ է։ Սուտասանի քաղաքականություն։ Էժան ճարպկություն։ Այդպես հուսալի գործընկերներ ձեռք չեն բերում, միայն կորցնում են։ Գուցե 15-16-րդ դարերում կարելի էր այդպես քաղաքականություն կառուցել, կապ չկար, տելեգրամ-ալիքներ չկային։ Բայց հիմա ամեն ինչ անմիջապես ի հայտ է գալիս։ Իսկ սրանք միայն դրանով էլ զբաղվում էին։ Ինչպես քեզ վստահեն, եթե դու 20 տարի ռուսատյաց էիր, հոդվածներ էիր գրում համապատասխան, միտինգներ էիր անում ռուսական ռազմակայանի դեմ։ Եվ հանկարծ ընտրությունից հետո դարձար ռուսամե՞տ։ Անվստահության տարրը կար ի սկզբանե»,- այս մասին ասաց Հայաստանի երկրորդ նախագահ, «Հայաստան» դաշինքի առաջնորդ, ՀՀ վարչապետի թեկնածու Ռոբերտ Քոչարյանը Թալինի բնակիչների հետ հանդիպման ժամանակ՝ պատասխանելով երկրի ներկայիս իշխանությունների քաղաքականության մասին հարցին։
«Հետո սկսեց խորամանկել։ Ռուսների հետ մի թեմա էր, իրանցիների հետ՝ ուրիշ։ Բայց որքան էլ որ ասեր, որ ռուսամետ է, նրանք հո հետեւում են Հանրային հեռուստատեսությանը, տեսնում են՝ ինչպես են իրենց պահում քո կողմնակիցները։ Հիմնական մունետիկը առհասարակ դարձել է «Ազատություն» ռադիոկայանը, որը ֆինանսավորվում է Պետդեպարտամենտի կողմից։ Եվ գործընկերները հասկանում են, որ իրենց փորձում են խաբել։ Միակ ճանապարհը ուղիղ եւ ազնիվ լինելն է։ Ես միշտ այդպես եմ արել։ Եվ հարաբերություններն էլ բոլորի հետ լավ էին։ Եթե ԱՄՆ-ին ասում ես՝ մեր հարաբերությունների միջանցքն ահա այսպիսին է, բայց այդ միջացքի շրջանակում ես պատրաստ եմ լիարժեք համագործակցության, դա աշխատում է։ Եթե չես մտնում նրանց հակաությունների ոլորտ, միշտ կարելի է համագործակցության քաղաքականություն վարել»,- նշեց Քոչարյանը։
Նա ընդգծեց, որ ՌԴ-ի հետ կվերականգնվի խախտված վստահությունը։ «Դուք ճիշտ եք, անձնական կապերը եւ անցած ճանապարհը կօգնեն դա արագ անել»,- նշեց նախկին նախագահը՝ պատասխանելով Ռուսաստանի նախագահի հետ իր հարաբերությունների մասին նկատառմանը։