Բանակցություններով պետք է Արցախի օկուպացված տարածքներից դուրս գան Ադրբեջանի ուժերը. Շարմազանով
«Թուրքիայի հետ ֆուտբոլային դիվանագիտությունը նախաձեռնել էմեր իշխանությունը եւ այն ժամանակ Հայաստանը գործոն էր տարածաշրջանում, այն ժամանակ ՀՀ-ի հետ հաշվի էին նստում եւ Թուրքիայի նման երկիրը չկարողացավ իր կապրիզները, իր ծրագրերը պարտադրել Հայաստանի կողմին: Դրա վառ ապացույցը 2009-ին Դավութօղլուի տապալումն էր: Նրանք ցանկանում էին հայտարարության մեջ Ղարաբաղի մասին կետ դնել, բայց ՀՀ իշխանությունը կտրուկ մերժեց: Հայաստանն այնքան ուժեղ էր, այնքան գործընկերնային էին աշխարհի հզորների հետ, որ երբ ԱՄՆ պետքարտուղար Քլինթոնն այցելեց Ծիծեռնակաբերդ, ուղղակի մեջբերեց Սերժ Սարգսյանին եւ նշեց, որ գնդակը Թուրքիայի կիսադաշտում է: Իսկ այսօր մեր վայ-իշխանությանն ո՞վ է մեջբերում: Ռուսաստանում ձեռ են առնում, Ադրբեջանն ու Թուրքիան փալասի պես օգտագործում են: Հայաստանը վեր է ածվել քաղաքական աուդսայդերի: մեր թիվ մեկ խնդիրը պետք է լինի կանգնեցնել գահավիժումը»,- ասուլիսի ժամանակ նշեց ՀՀԿ ԳՄ անդամ Էդուարդ Շարմազանովը:
Շարմազանովն անդրադարձավ նաեւ ներքաղաքական կյանքին՝ նշելով, որ «Պատիվ ունեմ» դաշինքը հիմնական ֆավորիտներից մեկն է. «Մեր քարոզարշավը գնում է աճման ուղղությամբ: «Մեր թիմը չի սահմանափակվում ցուցակով, շատ ավելի մեծ է: Անկախ նրանից, ցուցակում ենք, թե ոչ, մենք ցուցակում ենք»,-ասաց նա:
Ինչ վերաբերում է Արցախի խնդրին, նա ընդգծեց. «Արցախը երբեք չի լինելու Ադրբեջանի կազմում, պետք է հասնենք նրան, որ բանակցությունների միջոցով Արցախի օկուպացված տարածքներից դուրս գան ադրբեջանական օկուպանտները»: