Այն,ինչ նա ասում է, զառանցանքից բացի այլ ձևով ես ուղղակի չեմ կարողանում բնութագրել. Դավիթ Հարությունյան
«Այն, որ Արա Այվազյանի հայտարարությունը չէր պարունակում բավականաչափ դետալներ, ես համաձայն եմ, բայց այն, որ Արա Այվազյանը հստակ ներկայացրեց իրավիճակը, ես կարծում եմ՝ դա ևս ակնհայտ է։ Ցանկացած երկրում անվտանգության համար պայքարում են Զինված ուժերն ու արդեն դիվանագիտական կորպուսը։ Երեք տարի շարունակ ամեն ինչ արվեց, որպեսզի ջախջախվի մեր Զինված ուժերը, կազմալուծվի, հետագայում արեցին քայլեր, որ ջախջախվի նաեւ մեր դիվանագիտական կորպուսը։ Այսինքն՝ մենք այսօր զինվոր չունենք նաեւ մեր դիվանագիտական դաշտում, որը կկարողանա պաշտպանել մեր երկիրը, մեր անվտանգությունը»,- «Պատիվ ունեմ» դաշինքի հրավիրած մամուլի ասուլիսի ժամանակ ասաց դաշինքի ներկայացուցիչ Դավիթ Հարությունյանը։
«Շատ դժվար է արձագանքել զառանցանքներին, բայց կասեմ։ Նա մարդ է ,ով ընդհանրապես չի հասկանում ՝ ինչ է նշանակում Զինված ուժեր, նա մարդ է,որը կարծում է, որ զինված ուժերի հիմնական սկզբունքը ելակն է։ Իմ ասածը ամենևին չի նշանակում, որ մեր զինվորները եղել են սոված։ Այդ մարդը չծառայած լինելով՝ հավանաբար չի պատկերացնում՝ ինչ է Զինված ուժերը։
Բանակում իհարկե ռեստորանային սնունդ չի մատուցվում, բայց այն,ինչ նա ասում է, զառանցանքից բացի այլ ձևով ես ուղղակի չեմ կարողանում բնութագրել։ Զառանցանք է նաեւ այն, թե նա կարողացել է ապահովել ավելի շատ զենք-զինամթերք։ Իրականում նա արել է լրիվ հակառակը, նա մսխել է պաշտպանության բյուջեի միջոցները անիմաստ ձևով»,- ասաց Հարությունյանը։