Հայաստանը «ահաբեկչական և խամաճիկ պետություն» է. «Գորշ գայլերի» ներկայացուցիչ
«Գորշ գայլերի» քաղաքական թևը համարվող Թուրքիայի աջակողմյան «Ազգայնական շարժում կուսակցության» նախագահ Դևլեթ Բահչելին մարտի 2-ին ելույթ է ունեցել կուսակցության խորհրդարանական խմբակցության նիստի ժամանակ հիշատակել է Խոջալուի դեպքերի մասին՝ ամբողջովին ներկայացնելով թուրք-ադրբեջանական քարոզչական թեզերը: Հայաստանի և ներհայկական զարգացումների վերաբերյալ խոսելիս՝ թուրք կուսակցապետը անհիմն պնդումներ է արել՝ Հայաստանն անվանելով «ահաբեկչական և խամաճիկ պետություն»։
«Իսկ անցած շաբաթ բանակի կողմից վարչապետին ուղղված հրաժարականի կոչը, իրականում սպասելի վերջնարդյունքի դրսևորում էր: Իսկ երեկ ցուցարարները ներխուժել էին կառավարության շենք, որպեսզի ստիպեն Փաշինյանին հրաժարական տալ: Մենք ցանկանում ենք, որ բոլոր երկրներում գերակա լինի ժողովրդավարությունը, անգամ եթե խոսքը գնում է Հայաստանի մասին»,- ասել է Բահչելին։
Բահչելին Հայաստանին խորհուրդ է տվել դրսևորել սառնասրտություն և ողջախոհություն։
Այնուհետև շարունակելով ելույթն, ասել է. «Մեր ցանկությունն է, որ Հայաստանը հեռու մնա հեղաշրջումից և մոտ լինի ժողովրդավարությանը: Անգամ մեր թշնամու դեպքում չենք կորցնի վեհանձնությունը, ծնկի եկածին չենք խփի: Մենք թուրք ազգն ենք, Թուրքիան ենք»:
Հետևեք մեզ Viber-ում
