Պարո՛ն վարչապետ, մեղքի զգացում ունե՞ք պատերազմի արդյունքում զոհված հազարավոր հայրենակիցների, Արցախի 70% տարածքների կորստի համար. Աննա Կոստանյան
ԱԺ-ում Կառավարության հետ հարցուպատասխանի ժամանակ «Լուսավոր Հայաստան» խմբակցության պատգամավոր Աննա Կոստանյանը հարցով դիմեց Նիկոլ Փաշինյանին. «Արդյո՞ք ձեր կառավարությունն, իշխանությունն ապահովում է Հայաստանի անկախության մասին հռչակագրի հետևյալ դրույթների կենսագործումը՝ ազգերի ազատ ինքնորոշման իրավունքը, և եթե ապահովվում եք, ապա ինչպե՞ս եք ապահովվում ՀՀ Սահմանադրության նախաբանով ամրագրված քաղաքացիական համերաշխությունը Հայաստանում»:
Վարչապետի փոխարեն հարցին պատասխանեց արդարադատության նախարար Ռուստամ Բադասյանը՝ նշելով, որ այն, ինչ գրված է Սահմանադրության նախաբանում, ՀՀ և Կառավարության պարտականությունն է իրագործել. «Սահմանադրության նախաբանն ուղենիշ է պարունակում ամբողջ Սահմանադրության համար, այն սահմանադրական արժեքներ է սահմանում, որին Կառավարությունը պետք է հավատարիմ մնա»:
«Հարցս ուղղված էր Նիկոլ Փաշինյանին, և հռետորական հարց եմ ցանկանում հնչեցնել Փաշինյանին: Պարո՛ն վարչապետ, մեղքի զգացում ունե՞ք Ադրբեջանի կողմից սանձազերծված պատերազմի արդյունքում զոհված մեր հազարավոր զինվորականների, հայրենակիցների, Արցախի Հանրապետության 70 տոկոս տարածքների կորստի համար, խղճի խայթ զգո՞ւմ եք և, ի վերջո, ցավ ապրո՞ւմ եք»,-ասաց Աննա Կոստանյանը:
Հետևեք մեզ Viber-ում
