Ինչպե՞ս կարող էին ադրբեջանցիները հասնել Շուշի. արցախցի
«Այն, որ ադրբեջանցիները վերցրել են Շուշին, չի տեղավորվում ուղեղում եւ մտքերում: Ես Շահումյանից եմ. երբ վերցրեցին Շահումյանը, մեր ֆիդայինները դիրքերում էին: Մեր դիրքերը չէին հանձնվել, սակայն Շահումյանն արդեն հանձնվել էր: Այսինքն՝ մենք կորցրեցինք Շահումյանն առանց մարտական դիրքերի կորստի: Նույնը տեղի ունեցավ 2020 թվականին Շուշիի համար մարտերում»,- Հայելի ակումբում լրագրողների հետ հանդիպման ժամանակ ասաց Ղարաբաղից փախստական Լիանա Մինասյանը:
«Շուշին գտնվում է Ղարաբաղի կենտրոնում, եւ բացարձակ անհասկանալի է՝ ինչպես է ադրբեջանցիներին այդքան հեշտ հաջողվել հասնել Շուշի: Եվ դա այն դեպքում, երբ նրանք մարտիկին բնորոշ գծեր չունեն: Սակայն նրանք վերցրեցին Շուշին, վերցրեցին ամրոցը: Դուք հասկանո՞ւմ եք, ինչի մասին ենք մենք ընդհանրապես խոսում: Իհարկե, մարտեր կային, սակայն դրանք չպետք է անցնեին Շուշիի սահմանների մոտ: Բնակիչներից ոչ ոք չէր հանձնվում: Այդպիսով, թե ինչպես է այդ ամենը տեղի ունեցել, հանելուկ է մնում, եւ ինձ թվում է, որ դեռ երկար ժամանակ այդ հարցը չպարզված կմնա»,-նշեց Շուշիից փախստականը: