Նիկոլ Փաշինյանի շանտաժի արդյունքը. որ պատգամավորներն են խելոքացել
Այսպիսով՝ ԱԺ-ն ԲԴԽ անդամի 2 թափուր պաշտոնը համալրեց երկու աղմկահարույց կադրերով՝ փակ, գաղտնի քվեարկությամբ ընտրելով լեւոնական Գագիկ Ջհանգիրյանի եւ ՀՔԾ պետ Սասուն Խաչատրյանի եղբոր` Սորոսի հիմնադրամի խորհրդի նախկին նախագահ Դավիթ Խաչատուրյանի: ԲՀԿ եւ ԼՀԿ ոչ քննարկմանը մասնակցեցին, եւ ոչ էլ քվեարկությանը : Թեկնածուների քվեարկության պատկերն առավել քան խոսուն էր, այն ի ցույց դրեց ներիշխանական տիրույթում Նիկոլ Փաշինյանի եւ իր պատգամավորների փոխհարաբերությունները, ընդ որում նաեւ նրանց, ովքեր կապիտուլացիայի փաստաթղթի ստորագրումից հետո դուրս են եկել խմբակցությունից եւ համալրել անկախ պատգամավորների շարքերը: Բբացի դրանից պարզորոշ դարձրեց Փաշինյանի ապագա պլանները: Ինչպես:
Հայտարարվեց, որ քվեարկությանը մասնակցել է 89 պատգամավոր` իմքայլականներն ու թվով անկախները: Հիշեցնենք, որ անկախ պատգամավորների ցանկում են նաեւ Արման Բաբաջանյանը,Սերգեյ Բագրատյանը եւ Տիգրան Ուրիխանյանը: Ջհանգիրյանին կողմ քվեարկեց 86, Խաչատուրյանին` 85 պատգամավոր: Խնդիրն այն է, որ 88 հոգանոց Իմ Քայլը խմբակցությունից հինգ պատգամավոր է դուրս եկել, այսինքն իշխող խմբակցությունն այսօր 83 պատգամավոր ունի, ԲԴԽ անդամի ընտրության նիստից ըստ պաշտոնական կայքի բացակայում էին եւս երկուսը, ինչը կնշանակի, որ Իմ Քայլից 81 պատգամավոր է ներկա եղել, այդ ինչպես 86 հոգի կողմ քվեարկեց, մենք հաշվում ենք նաեւ Բաբաջանյանի եւ Բբագրատյանի ձայները, որոնք պարզորոշ գտնվում են Փաշինյանի վերահսկողության ներքո: Նույնիսկ այդ պարագայում պարզ մաթեմատիկական հաշվարկով 83 պատգամավոր է ստացվում: Սա նշանակում է, որ աղմկահարույց թեկնածուներին կողմ են քվեարկել նաեւ նախկին իմքայլականները: Ինչու՞, հարցի պատասխանը կարելի է գտնել վերջին շաբաթվա մամուլն ընթերցելիս, համաձայն որի Նիկոլ Փաշինյանը կրկին թերթում է իր պատգամավորների դոսյեները, կոմպրոմատների փաթեթը հանել է, որպեսզի կարողանա իրականացնի իր ծրագիրը, եւ խորհրդարանում սահմանադրական փոփոխությունների ճանապարհով առանց վարչապետի հրաժարականի լուծարի Ազգային ժողովը: Իսկ այդ փոփոխությունը ընդունելու համար պահանջվում է 88 ձայն: Դատելով ԲԴԽ անդամների քվեարկության պատկերից, Նիկոլ Փաշինյանը ընթացքի մեջ է դրել շանտաժն ու սպառնալիքը եւ այս պահի դրությամբ հաջողվել է մի քանիսին խելոքացնել
Անի Սահակյան