Զինկոմիսարիատների դիմաց 24-ժամյա հերթեր պետք է լինեն. Փաշինյան

«Այսօր զինկոմիսարիատների առաջ պետք է հերթեր գոյացած լինեն: 24 ժամ պետք է հերթեր լինեն: Մարդիկ պետք է պատրաստ լինեն կատարել ՊԲ հրամանատարի ցանկացած հրաման, որովհետև այսօր մեր ժողովրդի ճակատագրն է որոշվում», - ֆեյսբուքյան ուղիղ եթերի ժամանակ ասաց ՀՀ վարչապետ Նիկոլ Փաշինյանը՝ միաժամանակ երախտագիտություն հայտնելով կամավորներին:

 «Ադրբեջանն ուզում է Ղարաբաղի կապիտուլյացիան, բայց Ղարաբաղն Ադրբեջանի կապիտուլյացիան չի ուզում: Մեր ժողովուրդը պետք է ցույց տա, որ կոտրվել չի լինելու, համաձայնվել չի լինելու, կապիտուլյացիա չի լինելու, և դրա թիվ մեկ արտահայտությունը պետք է զինկոմիսարիատների դիմաց 24-ժամյա հերթերը լինեն», - շեշտեց վարչապետը:

«Մենք պետք է հասկանանք, որ սա ճակատագրական պահ է, և հիշենք, որ առյուծի նման տղերք ունենք, որոնք բառիս բուն իմաստով առյուծի նման կռվում են: Մեր հանրության մեջ պետք է լինի այն տրամադրությունը, որ մարտի դաշտից փախածն արժանանա հանրային սուր պարսավանքի: Մենք պետք է համազգային կոնսենսուս ունենանք: Բոլոր այն մարդիկ, որոնք լքել են իրենց վստահված դիրքը, պետք է իմանան, որ արժանանալու են հանրային պարսավանքի», - ասաց նա:

Փաշինյանի խոսքով՝ անթույլատրելի է, երբ բժիշկն ու քաղաքացին համաձայնության են եկել տղային կորոնավիրուսային հիվանդություն վերագրել, որպեսզի նա խուսափի զորակոչից:

Վարչապետը միաժամանակ հիշեցրեց իր հայտարարությունը՝ ինքը պատրաստ է զոհվել հանուն հայրենիքի, մեկնել առաջնագիծ, բայց մեկը պետք է լինի՝ կատարելու վարչապետի պարտականությունները: