«Սիսական» փառապանծ ջոկատը նորանոր սխրանքներ է գործում

Ադրբեջանա-թուրքական-ահաբեկչական դաշինքի սանձազերծած պատերազմի երկրորդ օրը՝ 2020 թ. սեպտեմբերի 28-ին, Արցախ մեկնեց «Սիսական» ջոկատը՝ հրամանատարությամբ լեգենդար Աշոտ Մինասյանի (Աշոտ Երկաթ):

Դրանից մեկ օր անց «Սիսական» ջոկատը Պաշտպանության բանակի հրամանատարության հանձնարարությամբ ռազմաճակատի հարավ-արեւելյան թեւում դիրքեր է զբաղեցրել:

Քանիցս ջոկատը հայտնվել է մարտական գործողությունների խառնարանում եւ դրսեւորել հերոսական վարք:

Ցավոք ջոկատը չորս զոհ է տվել՝ Գարիկ Մուրադյան, Արթուր Գալստյան, Ներսես Մովսեսյան, Արտակ Մարգարյան. ավելի ուշ անուն առ անուն կանդրադառնանք այդ նահատակներից յուրաքանչյուրի սխրանքին:

Երեք օր առաջ հույժ կարեւոր մի քանի հարցով Սիսիան վերադարձած Աշոտ Մինասյանն այսօր կրկին մեկնում էր ճակատ. շտապում էր, տղերքը սպասում են…

Մի քանի րոպե տեւած հանդիպման ընթացքում հրամանատար Աշոտ Մինասյանը հավաստեց գլխավորը՝ ջոկատի տրամադրությունը մարտական է եւ պատրաստ է մինչեւ վերջ պաշտպանելու իրեն վստահված դիրքերի անձեռնմխելիությունը…

Ի դեպ, հրամանատրի հետ էր Արցախյան առաջին պատերազմի մեծահամբավ հրամանատարներից մեկի՝ երջանկահիշատակ Հովիկ Ազոյանի որդին՝ Բաղդասարը, ով «Սիսական» ջոկատում էր նաեւ 2016 թվականի ապրիլյան օրերին:

Մենք վերստին աղոթում ենք «Սիսական» ջոկատի բոլոր անդամների եւ նրանց աննկուն հրամանատար Աշոտ Մինասյանի համար՝ ջոկատին մաղթելով հաղթական վերադարձ:

Նաեւ շուտափույթ ապաքինում եւ առողջություն ենք մաղթում ջոկատի վիրավոր մարտիկներին...

Սամվել Ալեքսանյան

syuniacyerkir.am