ՌԴ Պետդումայի կրեմլամետ պատգամավորը դատապարտել է Հայաստանին ընդհանուր զորահավաք հայտարարելու համար

Ալեքսեյ Ժուրավլեւը Ռուսաստանի Պետդումայում ղեկավարում է Ռոդինա կրեմլամետ խմբակցությունը: Համանուն կուսակցության իրական ղեկավարը եւ հիմնադիրը հակահայ դիրքերից հանդես եկող, ռուս պահպանողական եւ հայրենասեր Դմիտրի Ռոգոզինն է |
ezerk.am. «Կարծես թե ՀՀ իշխանությունները, հայտարարելով ռազմական դրություն և ընդհանուր մոբիլիզացիա, այժմ առաջնորդվում են ոչ թե ողջախոհության ձայնով և հայ ժողովրդի ազգային շահերով, այլ գունավոր հեղափոխությունների կործանարար ոգով, որին նոր պաշտոնյաները պարտական ​​են իրենց բարձր դիրքի համար: Հայաստանի վարչապետ Նիկոլ Փաշինյանը բառացիորեն հետևում է իր իտալացի անվանակից Նիկոլո Մաքիավելիի հրահանգներին՝ ամեն գնով պահպանել իշխանությունը: Գինը՝ երկու կողմերի հազարավոր շարքային զինվորների և խաղաղ բնակիչների կյանքն է: Այս ամենը արդեն եղել է 1992-1994 թվականներին, չարժե կրկնել», – Ինտերֆաքսի հարցին պատասանելով, նշում է Ժուրավլևը:

Փաշինյանը պետք է չափավորի իր ոչ պատշաճ «հեղափոխական» եռանդը եւ խնդրին մոտենա թարմ ու սառը գլխով, այլ ոչ թե հարձակվի հարեւան պետության վրա՝ սեփական քաղաքականության կրախը քողարկելու ակնկալիքով, հավելել է ռուսական հայրենասիրության դիրքերից հանդես եկող պատգամավորը:

Նկատենք, որ համանման դիրքի են հարում Ռուսաստանի քաղաքական սպեկտրի բոլոր հատվածները՝ աջ լիբերալներից մինչեւ ձախակողմյանները, մասնավորապես կոմունիստները: Առաջիններին չի հետաքրքրում Երեւանի եւ Բաքվի քաղաքական ռեժիմների հակոտնյա բնույթը, իսկ վերջինները Արցախի ինքնորոշման վճռականությանը հակադրում են իրենց ապսոսանքը ԽՍՀՄ կործանման առթիվ՝ այն ժամանակ ընդհանուր զորահավաք լինել չէր կարող, ասել է Գենադի Զյուգանովը: