Նիկոլ Փաշինյանն է՞լ է պատրաստվում արտահերթ ընտրություններին

Մամուլում պարբերաբար տեղեկություններ են հայտնվում այն մասին, որ վարչապետ Նիկոլ Փաշինյանը խիստ դժգոհ է իր հորհրդարանական խմբակցությունից: Իմքայլական պատգամավորները միշտ չէ, որ կարողանում են լիակատար կերպով իրականացնել Փաշինյանի քաղաքական ծրագրերը: Եվ ահա այսօր մամուլում բավականին հետաքրքիր տեղեկություն հայտնվեց այն մասին, որ Փաշինյանն իր պատգամվորական թիմին վախեցնում է արտահերթ խորհրդարանական ընտրություններով:

Մի զարմացեք, իրականում այս տեղեկությունների մեջ կարող է և ճշմարտություն լինել, իսկ քաղաքական տրամաբանության տեսանկյունից այս տարբերակը Փաշինյանի համար կարող է նախընտրելի լինել:

Իրականում Փաշինյանի համար արտահերթ ընտրությունները կարող են մեթոդ դառնալ ոչ միայն որոշ ժամանակով երկարացնել սեփական պաշտոնավարումը, ինչպես նաև «պինցետով մաքրել» սեփական խմբակցությունը զանազան էլեմենտներից, ովքեր հնազանդ են ոչ թե Փաշինյանին, այլ իշխանության այլ փայատերերին: Խոսքն առաջին հերթին վերաբերվում է Սորոսի հիմնադրամին: Բաց աղբյուրներից մեզ հայտնի է, որ Փաշինյանի «Իմ քայլը» խմբակցությունում մինչև 30 հոգի «օտարածին» էլեմենտներ կան: Եվ, «ազատագրելով» սեփական թիմն այդ էլեմենտներից, նա կարող է խորհրդարանը լցնել անձամբ իրեն հավատարիմ կադրերով:

Փաշինյանի հաշվարկը պարզ է նաև այն առումով, որ նա լավ գիտակցում է սեփական վարկանիշի անկումը, և եթե ընտրությունները հետաձգվեն կես, մեկ կամ մեկուկես տարով, ապա այդ ընտրական ցիկլին ընդառաջ Փաշինյանի վարկանիշն էլ ավելի ցածր կարող է լինել: Իսկ թե հերթը հասնի հերթական ընտրություններին, ապա Փաշինյանը շատ ավելի քիչ թվով ձայներ կհավաքի:

Այս վարկածը էլ ավելի տրամաբանական է թվում, երբ վերլուծում ենք իշխանափոխությունից հետո տեղի ունեցած զարգացումները. երբ Փաշինյանն ակնհայտ կերպով տեսնում էր սեփական վարկանիշի անկումը, նա մի քաղաքական գործընթաց գեներացրեց, որի արդյունքը եղան 2018 թվականի դեկտեմբերին կայացած արտահերթ խորհրդարանական ընտրությունները: Ընտրություններ, որոնք կայացան հեղափոխական էյֆորիայի պայմաններում:

Ուստի պետք չէ զարմանալ, որ Փաշինյանն իր սեփական թիմին սպառնում է արտահերթ ընտրություններով:

Սևակ Դանիելյան

zham.am