«Հայերին Կարսում ընդունած քաղաքապետը ձերբակալվել է ահաբեկչության համար». Բաքվում չեն դադարում զարմացնել. Լուսանկար
Նախօրեին Թուրքիայում իրավապահները ձերբակալել են ընդդիմադիր ուժ համարվող քրդամետ «Ժողովուրդների դեմոկրատական կուսակցությունից» (HDP-ԺԴԿ) ընտրված Կարսի քաղաքապետ Այհան Բիլգենին:
Ըստ թուրքական «Անադոլու» և մի շարք այլ լրատվական գործակալությունների տվյալների, Այհան Բիլգենին բերման է ենթարկվել երեկ առավոտյան:
Սիրիայի Քոբանի բնակավայրի վրա կատարված հարձակումների (2014թ․) պատճառով Թուրքիայի քրդաբնակ շրջաններում տեղի ունեցած բողոքի ակցիայի մասնակիցների և կազմակերպիչների դեմ Անկարայի հանրապետական գլխավոր դատախազության կողմից իրականացվող հետաքննության շրջանակում սեպտեմբերի 25-ի առավոտյան Կարսի նահանգային ոստիկանության վարչության աշխատակիցները ներխուժել են Բիլգենի տուն։
Խուզարկման աշխատանքներ իրականացնելուց հետո քաղաքապետին զրահամեքենայով տեղափոխել են ոստիկանական բաժանմունք։
Ի նշան բողոքի՝ բազմաթիվ կուսակցականներ հավաքվել են քաղաքապետի տան դիմաց։
Հարկ է նշել, որ Կարսի քաղաքապետի ձերբակալության պատճառը հենց վերը նշված հանգամանքն է, մինչդեռ ադրբեջանական հայտնի «Haqqin.az»-ը փորձում է սլաքներն ուղղել այլ կողմ՝ շեշտադրելով հայկական գործոնը:
«Принимавший армян в Карсе мэр арестован за терроризм» («Հայերին Կարսում ընդունած քաղաքապետը ձերբակալվել է ահաբեկչության ահամար»), ահա, այսպիսի վերնագրով է «հայտնի» ադրբեջանական կայքը լուսաբանում Կարսի քաղաքապետ Այհան Բիլգենի ձերբակալությունը:
Հղելով թուրքական «Անադոլու» գործակալության հաղորդագրությանը, այնուհետև կայքը գրում է հետևյալը.
«Կարսի քաղաքապետը ճանաչում է ձեռք բերել դեռևս 2014 թ., երբ կոչ էր անում «Քուրդիստանի բանվորական կուսակցության» (ՔԲԿ-PKK) անդամներին վրեժ լուծել Քոբանիում տեղի ունեցած դեպքերից հետո: Իսկ 2019 թ. նա հայտնվեց թուրքական մամուլի էջերում այն բանից հետո, երբ Կարս հրավիրեց պատվիրակությանը Հայաստանից: Կարս ժամանած հայկական պատվիրակության մեջ էին սպորտի, մշակույթի և տուրիզմի ղեկավար Իշթան Զաքարյանը, ԵՊՀ պատմության ֆակուլտետի դեկան Էրիկ Մինասյանը, պատմության ուսուցիչ Էրիկ Սողոմոնյանը և այլոք», - գրում է «Haqqin.az»-ը, հավելելով, որ այն ժամանակ Այհան Բիլգենի գործողությունները լուրջ դժգոհություն են առաջացրել Թուրքիայում:
«Հայկական պատվիրակությանը Կարս հրավիրելը քննադատել են այլ կուսակցությունների պատգամավորներ, որոնք իբր հիշեցրել են «Հայաստանի կողմից Ադրբեջանի տարածքների «օկուպացման» մասին»», - եզրափակում է կայքը, չմոռանալով հիշեցնել ղարաբաղյան հակամարտությունը:
Նշենք, որ 2014թ․ Սիրիայի Քոբանի քրդաբնակ քաղաքի դեմ իսլամիստների հարձակման կապակցությամբ բողոքի ակցիաներ էին կազմակերպվել Թուրքիայի տարբեր բնակավայրերում։ Հոկտեմբերի 6-7-ին ցուցարարների և ոստիկանության միջև տեղի ունեցած բախումների հետևանքով 46 մարդ էր մահացել, ևս 682-ը վիրավորվել։ Ընդհանուր առմամբ կալանավորվել էր 323 ցուցարար։
Թուրքիայի նախագահ Ռեջեփ Թայիփ Էրդողանը մեղադրել էր HDP-ի նախկին համանախագահներ Սուլեյման Դեմիրթաշին և Ֆիգեն Յուքսեքդաղին բողոքի ակցիաների կազմակերպման ու այդ ժամանակ ոստիկանության հետ բախումների ընթացքում զոհ գնացած տասնյակ քաղաքացիների մահվան համար։ Վերջիներս այդ գործով կալանավորված են։
Zham.am