«Ես պարոն Խունդկարյանին ինչ-որ մի փուլում կարող եմ կողմ քվեարկել». Հրայր Թովմասյան

168 ժամը գրում է.  3 դեմ և 2 կողմ ձայներով Երվանդ Խունդկարյանը չընտրվեց Սահմանադրական դատարանի (ՍԴ) նախագահ:

Քիչ առաջ լրագրողների հետ զրուցեց ՍԴ դատավոր Հրայր Թովմասյանը:

– Դուք մնում եք Ձեր այն համոզմանը, որ եղել են պայմանավորվածություննե՞ր, թե՞ այլ սցենար է աշխատում:

– Ես ինչ ասել եմ, որևէ բան այս պահի դրությամբ սխալ դուրս չի եկել: Մնացածի մասին մեկնաբանություններ չունեմ:

– Այսինքն՝ այլ սցենա՞ր կա, պարոն Թովմասյան, ինչպես առավոտյան ասացիք:

– Դուք իրադարձությունները դրեք իրար հետևից և ինքներդ եզրահանգումներ արեք:

– Ձեզ համար անսպասելի՞ էր այս ընտրության վերջաբանը:

– Ես առավոտյան ասացի, որ որևէ սցենար էլ ինձ համար անսպասելի չի լինի: Հարցրիք՝ կարո՞ղ է չընտրվի, ասացի՝ կարող է:

– Նոր թեկնածու առաջադրելո՞ւ եք:

– Տեսնենք: Կլսեմ գործընկերներիս, կքննարկենք, կտեսնենք:

– Կինքնառաջադրվե՞ք:

– Ինքնառաջադրվելու մասով ես ոչինչ չեմ ասել, հիմա էլ ոչինչ չունեմ ասելու:

– Դուք Խունդկարյանին չե՞ք տեսնում՝ որպես ՍԴ նախագահ:

– Թե ինչո՞ւ չեմ մասնակցել, ես երեկ դրա մասին բարձրաձայնել եմ: Ասել եմ, որ որոշ սցենարների պարագայում պարոն Խունդկարյանին կարող եմ միգուցեև կողմ քվեարկել:

– Բացի Ձեզնից՝ ո՞վ չի մասնակցել:

– Չեմ կարող ասել:

– Երկրորդ փուլը 10 օրի՞ց է, թե՞ 5:

– Ոչ շուտ, քան 10, ոչ ուշ, քան 30:

– Իսկ փոխնախագահի մասո՞վ…

– Երկուշաբթի օրը ժամը 11:00-ին կսկսվի նիստը:

– Դուք մասնակցելո՞ւ եք:

– Այո:

– ԱԺ փոխնախագահ Ալեն Սիմոնյանն ասում էր, որ Հրայր Թովմասյանը լավ կաներ՝ ընդհանրապես հեռանար, հրաժարական ներկայացներ, նրա կերպարը ձանձրացրել է հանրությանը: Դուք նման տպավորություն ստացե՞լ եք:

– Ես քաղաքական գործիչների ասածը չեմ մեկնաբանում, այդպիսի իրավաբան չեմ ճանաչում:

Մանրամասները՝ տեսանյութում