Գագիկ Ծառուկյանը ներկա կլինի դատարանի որոշմանը
Երևանի ընդհանուր իրավասության դատարանի բակում լրագրողների հետ զրույցում ԲՀԿ առաջնորդ Գագիկ Ծառուկյանի փաստաբան Երեմ Սարգսյանը ասաց. «Այստեղ՝ ոչ միայն մի դատավոր, ոչ թե մի պաշտոնատար անձ, այլ մի ամբողջ դատական համակարգ՝ վճռաբեկ դատարանով հանդերձ, քուն ու դադար թողել էին և մտածում էին, թե երբ է այս գործը պաշտպանը ստանալու, որ վերցնեն ու 3 օրվա մեջ էլ բողոքի վերաբերյալ որոշում կայացնեն: Ցանկացած դեպքում, երբ Գագիկ Ծառուկյանը քաղաքական հայտարարություններ է անում, դրան հետևում է քրեական գործով՝ քննիչների, դատախազների, դատավորների կողմից կոնկրետ արձագանք: Այս դեպքում էլ, երբ հայտարարվեց համատարած հանդիպումների մասին… Կամ՝ նրանց հանձնարարվում է սա, որպեսզի անեն, կամ ուշադիր հետևում են մամուլին, տեսնում են, թե ինչ հայտարարություններ են արվում, և այս գործերով արագ որոշումներ են կայացնում ի վնաս, որ հետո իրենք լավ տեսքով հանդես գան քաղաքական իշխանության մոտ, ասեն՝ մենք արել ենք մեզանից կախված ամեն ինչ»:
Հարցին՝ ի՞նչ ակնկալիքներ ունի պաշտպանական թիմը, և արդյո՞ք որոշման հրապարակմանը Գագիկ Ծառուկյանը կմասնակցի, պատասխանեց.
«Գագիկ Ծառուկյանը որոշման հրապարակմանը կմասնակցի: Մշտապես ցավ եմ ապրում, որ այս միջնորդությունների քննարկումները չե՛ն լինում հրապարակային։ Պետք է հրապարակային լինի, պետք է տեսնեն բոլորը, թե ինչ է տեղի ունենում, որ հետագայում չասեն՝ ամեն ինչ օրինական էր, դատարանն օրինական որոշում է կայացրել։ Եթե կալանավորման որոշում լինի, ուրեմն դա քաղաքական հետապնդման շարունակությունն է»։
Հետևեք մեզ Viber-ում
