Պատրաստել եմ հարցեր ՍԴ նախագահի թեկնածուին. Արևիկ Պետրոսյան

  ՍԴ դատավոր Արևիկ Պետրոսյանը լրագրողներին ասաց, որ պատրաստել է հարցեր ՍԴ նախագահի թեկնածուին, կլսեմ պատասխաններ, ելույթ եմ ունենալու, ամփոփումներ կկատարեմ ինքս իմ մեջ և իմ ընտրությունը կիրականացնեմ։

Հարցին՝ որն է իրեն ամենաշատ հուզող հարցը, Արևիկ Պետրոսյանն ասաց, որ իր հարցադրումները կապված են լինելու սահմանադրաիրավական փոփոխությունների, ՍԴ մասին օրենքի լուծումների, առաջիկա զարգացումներին. «Իր առաքելությունն ինչպես է տեսնում, խնդիրների լուծումն ինչպես է տեսնում, ճգնաժամային իրավիճակներում լուծումներն ինչպես է տեսնում, պատրաստակամությունն ինչպիսինն է։ Հարցեր, որոնք անհրաժեշտ են արդյունավետ, օբյեկտիվ աշխատանք իրականացնելու համար»,-ասաց Արևիկ Պետրոսյանը։

Անդրադառնալով հարցին՝ արդոք իր համար խնդրահարույց չէ, որ միայն մեկ թեկնածու է ՍԴ-ի նախագահի պաշտոնում այս պահին առաջադրված, Արևիկ Պետրոսյանը նկատեց՝ իրավիճակ է, որն ունենք. «Փաստ է, իրողություն է։ Որևէ խնդիր այստեղ չեմ տեսնում։ Կարող էր նաև ընդհանրապես թեկնածու չլինել, կարող էին լինել մի քանիսը»,-ասաց ՍԴ դատավորը։

Արևիկ Պետրոսյանը չի կարծում՝ այսօր կլինեն առաջադրումներ։ ՍԴ դատավորն ընդգծեց, որ ինքնանպատակ որևէ պրոցեսի չի մասնակցի, բոլոր հարցերի վերաբերյալ ունի իր դիրքորոշումը։

Հարցին՝ ՍԴ նախագահի և փոխնախագահի ընտրություններով հանգուցալուծվու՞մ է ՍԴ-ի շուրջ ստեղծված ճգնաժամը, Արևիկ Պետրոսյանը նշեց, որ իր պատկերացմամբ խնդիրների շրջանակը ոչ միայն ՍԴ-ի նախագահի և փոխնախագահի ընտրությամբ է պայմանավորված։