Իշխանությունները վախի, ցայտնոտի մեջ են. Տոնոյան
«ԲՀԿ-ն միտում է տեսնում, որ Գագիկ Ծառուկյանի կալանավորման միջնորդության քննարկումը մակագրվել է դատավոր Մնացական Մարտիրոսյանին։Մենք կոնկրետ միտում ենք տեսնում՝ այս գործընթացը երկրորդ փուլով իրականացնելու իշխանության ցայտնոտային վարքագծի մեջ։ Կանխակալ մոտեցում ենք տեսնում, որ իրենց համար ցանկալի դատարանում, իրենց համար ցանկալի դատավորի գործի քննությամբ կարողանան հասնել պարոն Ծառուկյանի կալանավորմանը»,- դատարանի մոտ հայտարարեց ԲՀԿ խմբակցության պատգամավոր Իվետա Տոնոյանը։
«Մեզ համար խիստ կանխատեսելի են իշխանության բոլոր քայլերը, որոնք մեկը մյուսի հետևից իրականություն են դառնում, «Բարգավաճ Հայաստանի» շարքերում որևէ խուճապ, արտահոսք չկա։ Իշխանությունները շատ աղոտ հույսեր են փայփայում, թե Գագիկ Ծառուկյանին կալանավորելով, մեր համակիրների նկատմամբ տարբեր տեսակի քրեական գործեր հարուցելով կարող են կանխել այն գործընթացը, որը մեկնարկել է, բայց միևնույն է, ուզում եմ նրանց հիասթափեցնել և ասել, որ դադարեն նման գործելաոճով հանդես գալ, որովհետև գործընթացն այլևս անկասելի է և հասնելու է իր տրամաբանական ավարտին, այսինքն՝ հոկտեմբերի 8-ի համապետական հանրահավաքին»,- նշեց Տոնոյանը։
«Այն քաղաքական հետապնդման գործընթացը, որը մեկնարկել է, այդ տրամաբանության շրջանակներում հնարավոր է ամեն ինչ, այդ թվում՝ և Նաիրա Զոհրաբյանի, և մնացած բոլոր պատգամավորների մասով տարբեր տեսակի քրեական գործերի հարուցումը։ Կարծում եմ, որ սա ևս մեկ անգամ վկայում է իշխանությունների վախի, ցայտնոտի, անհանգստության մասին, որ բոլոր հնարավոր և անհնարին միջոցներով փորձում են լռեցնել իրենց քաղաքական ընդդիմախոսներին»,- ասաց Տոնոյանը։