«Գոլդեն Փելիս» հյուրանոցը կրկին կդրվի աճուրդի
Կառավարության նիստից հետո լրագրողների հետ զրույցում Պետգույքի կառավարման կոմիտեի նախագահ Նարեկ Բաբայանը նշեց, որ Ծաղկաձորի «Գոլդեն Փելիս» հյուրանոցի աճուրդը կրկին կսկսվի մեկնարկային կետից: Նախորդ աճուրդի գործընթացը դադարեցվել էր, քանի որ այնտեղ կորոնավիրուսի համավարակի կոնտակտային անձինք էին տեղակայված,- ասաց նա:
Հարցին՝ արդյոք գնի վրա չի ազդի, որ այդ հյուրանոցում կորոնավիրուսով վարակված անձիք կամ կոնտակտավոր մարդիկ են եղել, նա նշեց, որ որևէ լուրջ գիտական փաստարկ չի կարող լինել այդ մասին և գնի վրա կարող է ազդել միայն տնտեսական վիճակը ու, առհասարակ, ներդրումների հետաքրքրվածությունը։ Նարեկ Բաբայանն ասաց, որ եթե աճուրդը չկայանա, նախատեսել են գնի իջեցում։
«Աճուրդի հանված գույքերի նկատմամբ որոշակի հետաքրքրվածություն եղել է, թեև որոշ մրցույթներ չեն կայացել: Հիմա փորձում ենք հասկանալ խնդիրները, որոնք երեք մասի կարող են բաժանվել՝ իրազեկվածություն, գնի բարձր լինելը ու մի խնդիր կար, որ պարտավորությունների ստանձնման դեպքում պետք է գրավադրված լինի գույքը: Կառավարության այսօրվա որոշմամբ՝ այդտեղ ճկունություն ենք մտցրել ու կարող ենք բանկային երաշխիք կիրառել պարտավորությունների կիրառման համար», -ասաց Բաբայանը։