Դպրոցների վերաբացման հետ կապված՝ կորոնավիրուսի բռնկման 2-րդ ալիքի հավանականություն կա. Ավինյան
«Հավաքների ազատության իրավունքը վերականգնվում է և որևէ այլ սահմանափակում, քան հակահամաճարակային կանոնների պահպանումը՝ դիմակների կրումը և սոցիալական հեռավորության պահպանում, չկա: Ո´չ ժամային, ո´չ էլ քանակական սահմանափակումներ չեն լինելու»,- ԱԺ հատուկ նիստին ասաց փոխվարչապետ, պարետ Տիգրան Ավինյանը:
ԱԺ «Իմ քայլը» խմբակցության պատգամավոր Արթուր Հովհաննիսյանը հետաքրքրվեց՝ արդյոք ռիսկերը հաշվարկել են, քանի որ եղանակային պայմանների փոփոխմամբ կարող է վարակն ակտիվանալ և այս առումով հավաքների, միջոցառումների անցկացումը, մասնակիցների քանակի ավելացումը ռիսկեր պարունակո՞ւմ են, թե չէ:
«Միանշանակ յուրաքանչյուր մեղմացում պարունակում է համաճարակային թվերի աճի որոշակի ռիսկեր, և Կառավարությունը փորձում է «հնարավորինս բալանսավորված քաղաքականություն վարել մեղմացումների առումով»: Համաճարակային իրավիճակի բարելավման հետ տրամաբանական է, որ գնում ենք որոշակի մեղմացումների: Կարծում եմ՝ շարունակելու ենք գնալ մեղմացումների, եթե դինամիկան շարունակվի դրական մնալ: Այնուամենայնիվ, միանշանակ ճիշտ եք, որ երկրորդ հնարավոր ալիքի հավանականությունը կա: Այդ առումով հիմնական ռիսկը կապված է լինելու հանրակրթական դպրոցների բացման հետ, որտեղ ենթադրվում է մեծաքանակ մարդկանց տեղաշարժ: Այնուամենայնիվ, մեր գնահատմամբ՝ այդ ռիսկը ևս կառավարելի է. թե´ առողջապահական համակարգն է պատրաստ որևէ հնարավոր բռնկման, և թե´ մենք կառավարման պլաններով ունենք այլընտրանքային խստացումների մեխանիզմներ, որոնք որոշակի թվերի պայմաններում իրականացնելու ենք»,- ասաց նա: